«ҰЛТ САУЛЫҒЫН ҰЛЫҚТАҒАН ДӘРІГЕР» АТТЫ САЛТАНАТТЫ ШАРА ӨТТІ

Кеше, 10:30

1 507

Қызылорда қаласындағы «Өнер орталығында» Медицина қызметкерлері күніне арналған «Ұлт саулығын ұлықтаған дәрігер» атты салтанатты шара жоғары деңгейде ұйымдастырылып, ақ халатты абзал жандардың мерейін үстем еткен тағылымды басқосу өтті. Адам өмірі мен денсаулығын сақтауды басты мұрат еткен дәрігерлер мен медицина қызметкерлерінің еңбегін ұлықтауға арналған мерекелік жиынға облыс әкімі Мұрат Ергешбаев, ҚР Парламенті Сенатының депутаттары Нұртөре Жүсіп, Бекбол Орынбасаров, Амангелді Есбай, құқық қорғау органдарының басшылары, облыстық мәслихат депутаттары, зиялы қауым өкілдері, медицина саласының ардагерлері, денсаулық сақтау ұйымдарының басшылары мен қызметкерлері қатысты.

Салтанатты рәсім Мемлекеттік Әнұранмен басталып, медицина саласының жетістіктері мен аймақтағы денсаулық сақтау жүйесінің даму жолын бейнелейтін арнайы бейнеролик көрсетілді. Онда соңғы жылдары өңірде бой көтерген жаңа медициналық нысандар, заманауи құрал-жабдықтармен жабдықталған емдеу мекемелері, жоғары технологиялық операциялар мен сала мамандарының жетістіктері кеңінен қамтылды.

Аймақ басшысы Мұрат Ергешбаев медицина қызметкерлерін кәсіби мерекелерімен құттықтап, олардың қоғамдағы орны мен еңбегінің маңыздылығына тоқталды.

– Денсаулығымыздың қорғаны, адам жанының арашасы, мейірім мен ізгіліктің жаршысы болған ақ халатты абзал жандардың еңбегі қашанда елеулі әрі қадірлі. Дәрігер мамандығы – үлкен жауапкершілік пен кәсіби шеберлікті ғана емес, адамға деген ерекше жанашырлықты талап ететін қасиетті кәсіп. Сіздер күн сайын адам өмірі үшін күресіп, талай жанға үміт сыйлап келесіздер. Сондықтан да халықтың шынайы құрметіне бөленген мамандық иесі ретінде әрдайым жоғары бағаланасыздар, – деді облыс әкімі.

Аймақ басшысы өз сөзінде Мемлекет басшысы Қасым-Жомарт Тоқаевтың денсаулық сақтау саласын дамытуға ерекше мән беріп отырғанын атап өтті.

– Президентіміз Қасым-Жомарт Кемелұлы Тоқаев: «Ұлт саулығы – еліміз үшін бәрінен қымбат құндылық. Сондықтан медицина саласын дамыту мемлекеттің стратегиялық міндеті саналады» деп атап көрсеткен болатын. Бұл – сала мамандарына деген жоғары сенім мен құрметтің айқын көрінісі. Мемлекет тарапынан көрсетіліп жатқан қолдаудың нәтижесінде еліміздің денсаулық сақтау жүйесі жаңа сапалық деңгейге көтерілуде, – деді өңір басшысы.

Сондай-ақ облыс әкімі жиын барысында ҚР Премьер-министрінің бірінші орынбасары Нұрлыбек Нәлібаевтың медицина қызметкерлеріне арнаған арнайы құттықтау хатын оқып беріп, сала мамандарына ізгі тілегін жеткізді.

Шара барысында Сыр өңірінің медицина саласындағы жетістіктері ерекше аталып өтті. Соңғы жылдары облыстың денсаулық сақтау жүйесі қарқынды дамып, күрделі операциялар мен жоғары технологиялық емдеу әдістері енгізілуде. Бұл бағыттағы табыстар аймақтағы дәрігерлердің кәсіби біліктілігі мен жауапкершілігінің нәтижесі екені айтылды.

Облыс әкімі Қазақстанның Еңбек Ері, әлемге танымал кардиохирург Юрий Пяның еңбегіне арнайы тоқталды. Ол өзінің еңбек жолында бес мыңнан астам ашық жүрек отасын жасап, мыңдаған адамның өмірін сақтап қалды. Оның медицина саласындағы жетістіктері тек Қазақстанда ғана емес, халықаралық деңгейде де жоғары бағалануда.

Сонымен қатар еліміздің бас хирургі, профессор Болатбек Баймахановтың жетекшілігімен жүзеге асқан тарихи операция жөнінде айтылды. Медицина тарихында алғаш рет бір мезетте үш науқасқа үш донордың бүйрегін трансплантациялау бойынша аса күрделі операция сәтті өткізілді. Бұл – отандық медицинаның жоғары мүмкіндігін көрсеткен айтулы жетістік.

Аймақ басшысы жақында ғана Президент Жарлығымен ІІ дәрежелі «Барыс» орденімен марапатталған Болатбек Баймахановты барша сырбойылықтардың атынан құттықтап, оның еңбегі жас дәрігерлер үшін үлкен үлгі екенін атап өтті.

Соңғы жылдары Қызылорда облысында трансплантология саласы да қарқынды дамуда. Былтыр өңір тарихында алғаш рет бауыр трансплантациясы жасалып, 10 науқасқа бүйрек ауыстыру отасы сәтті жүргізілді. Сонымен бірге медициналық тәжірибеге күрделі операциялардың алты жаңа түрі енгізілді. Бұл көрсеткіштер облыс медицинасының жаңа деңгейге көтерілгенін айғақтайды.

Салтанатты рәсімде денсаулық сақтау саласының дамуына елеулі үлес қосқан бірқатар мамандар мемлекеттік наградалармен және ведомстволық марапаттармен наградталды. Олардың қатарында көп жылдық еңбегімен ерекшеленген дәрігерлер, орта буын медицина қызметкерлері, санитарлық-эпидемиологиялық қызмет өкілдері және денсаулық сақтау ұйымдарының басшылары бар.

Марапатталғандар қатарында «Парасат» және «Құрмет» ордендерінің иегерлері, «Ерен еңбегі үшін», «Шапағат» медальдарымен марапатталған азаматтар, Денсаулық сақтау министрлігінің «Еңбек ардагері» медалінің иегерлері, «Денсаулық сақтау ісінің үздігі», «Денсаулық сақтау ісіне қосқан үлесі үшін» төсбелгілерін алған мамандар болды. Сондай-ақ бірқатар қызметкерлерге «Қазақстанның еңбек сіңірген дәрігері» құрметті атағы беріліп, ҚР Премьер-министрінің бірінші орынбасарының Алғыс хаты, облыс әкімінің Алғыс хаты мен Қызылорда облысының Құрмет грамотасы табысталды.

Шара барысында сөз алған сала ардагерлері мемлекет тарапынан көрсетіліп жатқан қолдау үшін алғыстарын білдіріп, жас дәрігерлерге ақ батасын берді. Олар дәрігерлік мамандықтың қоғам алдындағы жауапкершілігі жоғары екенін айтып, халыққа адал қызмет етудің маңыздылығына тоқталды.

Бүгінде Президент пен Үкіметтің қолдауының арқасында Қызылорда облысының денсаулық сақтау саласы жаңа даму кезеңіне қадам басты. 2022 жылдан бері аймақтың денсаулық сақтау жүйесіне 625 миллиард теңгеге жуық қаржы бөлініп, 41 жаңа медициналық нысан пайдалануға берілді. Бұл ауыл тұрғындарының сапалы медициналық қызметке қолжетімділігін арттыруға мүмкіндік жасады.

«Ауылда денсаулық сақтауды жаңғырту» ұлттық жобасы аясында барлық ауданда 28 медициналық нысан салынды. Жаңа дәрігерлік амбулаториялар, медициналық бекеттер мен фельдшерлік-акушерлік пункттер заманауи құралдармен жабдықталып, тұрғындарға қызмет көрсетуде.

Қазіргі таңда облыс орталығында емханасы мен онкологиялық бөлімшесі бар 300 орындық көпбейінді аурухананың құрылысы жүргізілуде. Сонымен бірге 400 және 500 келушіге арналған жаңа емханалар мен 200 орындық перинаталдық орталық салынуда. Бұл нысандар іске қосылғаннан кейін өңір тұрғындарына көрсетілетін медициналық қызметтің сапасы айтарлықтай жақсарады.

Алдағы жылдары да денсаулық сақтау инфрақұрылымын дамыту жұмыстары жалғасады. Бірқатар аурухана мен емханалар күрделі жөндеуден өткізіліп, медициналық жабдықтар жаңартылады. Сонымен қатар кадрлық әлеуетті нығайту, дәрігерлердің біліктілігін арттыру және ауылдық жерлердегі маман тапшылығын шешу бағытындағы жұмыстар тұрақты түрде жүргізілмек.

Іс-шара соңында медицина саласының ардагерлеріне гүл шоқтары табысталып, өңір өнерпаздарының қатысуымен мерекелік концерттік бағдарлама ұсынылды. Кеш барысында дәрігерлер мен медицина қызметкерлеріне арналған әндер шырқалып, шығармашылық ұжымдардың өнері көрермендердің ыстық ықыласына бөленді.

Ақ халатты абзал жандарға құрмет көрсетілген тағылымды шара медицина қызметкерлерінің қоғамдағы мәртебесін арттырып, олардың ел денсаулығын сақтаудағы ерен еңбегін тағы бір мәрте айшықтай түсті.

Қазіргі таңда денсаулық сақтау жүйесінің алдында тұрған басты міндеттердің бірі – халыққа көрсетілетін медициналық көмектің сапасы мен қолжетімділігін арттыру. Бұл бағытта Қызылорда облысында жүйелі жұмыстар атқарылып келеді. Өңірдегі медициналық ұйымдардың материалдық-техникалық базасын нығайту, заманауи медициналық технологияларды енгізу, білікті кадрлар даярлау және олардың әлеуметтік жағдайын жақсарту мәселелері кезең-кезеңімен шешімін табуда.

Соңғы жылдары облыстың медицина ұйымдары жаңа үлгідегі медициналық құрал-жабдықтармен қамтамасыз етілді. Компьютерлік томография, магниттік-резонанстық томография, ангиография, эндоскопиялық және лапароскопиялық қондырғылар, жоғары дәлдіктегі зертханалық құрылғылар халық игілігіне пайдалануға берілді. Мұның нәтижесінде бұрын республикалық деңгейдегі клиникаларда ғана жасалатын күрделі диагностикалық және емдік шаралар бүгінде өңірде де қолжетімді бола бастады.

Аймақта ана мен бала денсаулығын қорғауға ерекше көңіл бөлінуде. Соңғы жылдары перзентханалар мен босандыру бөлімдерінің материалдық-техникалық мүмкіндігі едәуір жақсарды. Ана өлімі мен нәресте өлімін төмендету бағытында жүргізілген жұмыстар өз нәтижесін беруде. Жүкті әйелдерді ерте кезеңнен бақылауға алу, қауіп тобындағы пациенттерге дер кезінде көмек көрсету, неонаталдық қызметті жетілдіру мәселелері тұрақты бақылауда.

Облыс бойынша алғашқы медициналық-санитарлық көмектің қолжетімділігін арттыру мақсатында бірқатар маңызды жобалар жүзеге асырылуда. Әсіресе ауылдық жерлердегі медициналық қызмет сапасын жақсартуға басымдық берілген. Бұған дейін тұрғындар аудан орталығына немесе облыс орталығына қатынап алатын көптеген қызмет түрлері бүгінде ауылдық жерлерде көрсетілуде.

«Ауылда денсаулық сақтауды жаңғырту» ұлттық жобасы аясында салынған жаңа медициналық нысандар шалғай елді мекен тұрғындары үшін үлкен мүмкіндікке айналды. Заманауи медициналық бекеттер мен дәрігерлік амбулаторияларда тұрғындарды қабылдауға барлық жағдай жасалған. Медициналық мекемелер қажетті құрал-жабдықтармен қамтылып, халыққа сапалы қызмет көрсетуде.

Мемлекет басшысының тапсырмасына сәйкес ауылдық жерлердегі кадр тапшылығын азайту мақсатында кешенді шаралар қабылдануда. Жас мамандарды өңірге тарту үшін тұрғын үй беру, көтерме жәрдемақы төлеу, әлеуметтік қолдау көрсету бағытындағы жұмыстар жалғасып келеді. Нәтижесінде соңғы жылдары облысқа көптеген жас дәрігер келіп, еңбек жолын бастады.

Денсаулық сақтау саласындағы оң өзгерістердің тағы бір маңызды бағыты – цифрландыру. Қазіргі таңда облыстағы медициналық ұйымдардың барлығы дерлік цифрлық жүйеге көшірілген. Электронды денсаулық паспорты, онлайн тіркелу, қашықтан кеңес беру және зерттеу нәтижелерін электронды түрде алу қызметтері тұрғындардың уақытын үнемдеуге мүмкіндік беруде.

Телемедицина қызметі де кеңінен қолданылуда. Соның арқасында шалғай аудандардағы науқастар республикалық клиникалардың жетекші мамандарынан кеңес ала алады. Бұл әсіресе күрделі диагноз қойылған пациенттер үшін үлкен қолдау болып отыр.

Медицина қызметкерлерінің кәсіби біліктілігін арттыру мәселесі де назардан тыс қалған жоқ. Жыл сайын жүздеген дәрігер мен орта буын медицина қызметкерлері еліміздің жетекші медициналық орталықтарында және шетелдік клиникаларда білімін жетілдіреді. Озық тәжірибе алмасу нәтижесінде жаңа емдеу тәсілдері өңірлік денсаулық сақтау ұйымдарына енгізілуде.

Сыр өңірінің дәрігерлері пандемия кезеңінде де жоғары жауапкершілік пен кәсібиліктің үлгісін көрсетті. Әлемді алаңдатқан індетпен күресте мыңдаған медицина қызметкері алдыңғы шепте болып, тұрғындардың өмірі мен денсаулығын қорғауға бар күш-жігерін жұмсады. Олардың жанқиярлық еңбегі халықтың жадында мәңгі сақталады.

Бүгінде облыста кардиология, нейрохирургия, онкология, трансплантология және травматология бағыттарында жоғары технологиялық медициналық көмектер көрсетіледі. Бұл бағыттағы жұмыстар өңір тұрғындарының басқа қалаларға бармай-ақ сапалы ем алуына мүмкіндік беріп отыр.

Аймақ медицинасының жетістіктері халықаралық және республикалық деңгейде жоғары бағалануда. Қызылордалық дәрігерлер түрлі ғылыми-практикалық конференцияларға қатысып, өз тәжірибелерімен бөлісуде. Олардың ғылыми зерттеулері мен жаңашыл бастамалары медицина ғылымының дамуына да үлес қосып келеді.

Салтанатты шара барысында марапатталған мамандардың арасында ондаған жыл бойы халық денсаулығын қорғауға қызмет еткен тәжірибелі дәрігерлер де, кәсіби жетістіктерімен ерекшеленген жас мамандар да болды. Бұл – денсаулық сақтау саласындағы сабақтастықтың жарқын көрінісі.

Ардагер дәрігерлердің еңбегі ерекше аталып өтті. Олар көптеген буын мамандарды тәрбиелеп, өңір медицинасының қалыптасуына өлшеусіз үлес қосты. Бүгінде олардың тәжірибесі мен ақыл-кеңесі жас буын үшін үлкен мектеп болып табылады.

Мерекелік кеште медицина қызметкерлерінің қоғам өміріндегі орны мен рөлін дәріптейтін концерттік бағдарлама ұсынылды. Өңірдің өнер майталмандары дәрігерлерге арнап ән шырқап, көрермендерге көтеріңкі көңіл-күй сыйлады. Әсіресе медицина ардагерлеріне көрсетілген құрмет пен ықылас көпшіліктің ризашылығына бөленді.

Жалпы, денсаулық сақтау саласын дамыту – мемлекет саясатының басым бағыттарының бірі. Бұл бағыттағы жұмыстар Қызылорда облысында да жүйелі түрде жалғасып келеді. Жаңа медициналық нысандардың салынуы, заманауи технологиялардың енгізілуі, кадрлық әлеуеттің артуы және жоғары технологиялық медициналық көмектің қолжетімді болуы өңір тұрғындарының өмір сапасын жақсартуға бағытталған маңызды қадамдар болып табылады.

Ақ халатты абзал жандардың еңбегі қашанда құрметке лайық. Олар күн сайын адам өмірі үшін күресіп, азаматтардың денсаулығын сақтауға қызмет етеді. Сондықтан медицина қызметкерлеріне көрсетілетін қолдау мен құрмет алдағы уақытта да жалғасын таба бермек.

Қызылорда облысы әкімінің баспасөз қызметі