Қызылордада бетін тұмшалаған 300-дей адамға ескерту берілді

Бүгін, 15:00

1 505

Қызылорда облысында қоғамдық орындарда адамның бет-әлпетін тануға кедергі келтіретін киім үлгілеріне қатысты заң талаптарын түсіндіру жұмысы тұрақты түрде жүргізіліп келеді,- деп хабарлайды Оpennews.kz ақпарат агенттігі.

Әкімшілік құқықбұзушылық туралы кодекстің 434-бабының 3-бөлігіне сәйкес қоғамдық орындарда адамның жүзін тануға кедергі келтіретін киім киюге тыйым салынған. Оған балаклава, медициналық мақсаттан тыс бетперде, никаб пен адамның бет-жүзін толық немесе ішінара жабатын өзге де киім түрлері кіреді.

Жыл басынан бері облыста аталған бап бойынша 303 әкімшілік құқық бұзу дерегі тіркелді. Соның 301-іне ескерту берілсе, 2-іне айыппұл салынды. Іс-шара барысында полиция қызметкерлері тұрғындармен кездесіп, заң талаптарын түсіндіріп, ақпараттық жадынамалар таратты. Сонымен қатар азаматтардың сұрақтарына жауап беріп, қоғамдық орындарда құқықтық сауаттылықты арттыруға бағытталған жұмыс жүргізді. Әсіресе, сауда-ойын-сауық орталықтарында, білім беру ұйымдарында және адамдар көп шоғырланатын орындарда профилактикаға мән беріледі, - делінген облыстық полиция департаментінің хабарламасында.

Полицейлердің айтуынша, мұндай іс-шаралардың негізгі мақсаты – азаматтарды жауапкершілікке тарту емес, құқықбұзушылықтың алдын алу. Заң талаптарын алғаш рет бұзған азаматтарға ескерту жасалады. Ал құқық бұзушылық қайталанған жағдайда заңнамаға сәйкес 10 айлық есептік көрсеткіш мөлшерінде әкімшілік айыппұл салынады.