Қызылордадағы Президент саябаяғында тегін Wi-Fi орнатылды
Қызылорда қаласындағы жаңартылған Тұңғыш Президент саябағында енді келушілер тегін Wi-Fi желісін пайдалана алады, - деп хабарлайды Opennews.kz ақпарат агенттігі.
«Қазақтелеком» іске қосқан жоба аясында саябақтың негізгі серуендеу аймақтарына төрт заманауи Wi-Fi роутері орнатылған. Желінің өткізу қабілеті айына 10 мыңға дейін пайдаланушыға қызмет көрсетуге мүмкіндік береді.
Компанияның мәліметінше, жаңа сервис тұрғындар мен қала қонақтарына интернетке еркін қосылып, мессенджерлерді пайдаланып, әлеуметтік желілерге фото-видео жүктеп, цифрлық қызметтерді қолдануға жағдай жасайды.
Тұңғыш Президент саябағы жақында ауқымды жаңғыртудан өтті. Қазіргі таңда мұнда спорт алаңдары, серуендеу аймақтары, субұрқақтар, шолу дөңгелегі, фудкорт пен кафелер жұмыс істейді. Енді бұл қатарға тегін Wi-Fi қызметі де қосылды.
