Қызылордада адам ағзасында дәке қалдырған аурухана 1,5 млн тг төлейді

Қызылорда облысында хирургиялық ота кезінде науқастың денесінде дәке тампоны қалып қойған. Сот медициналық мекемені науқасқа 1,5 млн теңгеден астам өтемақы төлеуге міндеттеді, - деп хабарлайды Opennews.kz ақпарат агенттігі.

Сот материалдарына сәйкес, әйелге кистаны алып тастау бойынша ота жасалған. Алайда екі айдан кейін науқас басқа медициналық мекемеге қайта жүгініп, сол жерде екінші рет ота жасалған. Операция барысында алғашқы хирургиялық араласу кезінде қалып қойған дәке тампоны анықталып, алынған.

Медициналық қателіктен кейін науқас ұзақ уақыт бойы ауырсынудан зардап шегіп, жарасы қабынып, күнделікті таңу процедураларынан өтуге мәжбүр болған. Сондай-ақ қайта отаға өз қаражатын жұмсаған.

Бөгде заттың науқастың денесінде қалғаны ота хаттамасы, медициналық құжаттар, бейнежазба және қайта емдеу жүргізілген медициналық мекеме өкілінің түсініктемесі арқылы расталған.

Сонымен қатар жоспардан тыс тексеру кезінде уәкілетті орган медициналық көмек көрсету барысында бірқатар заңбұзушылықты анықтаған. Атап айтқанда, операция кезінде міндетті стандарттар сақталмаған, отадан кейінгі бақылау тиісті деңгейде жүргізілмеген және медициналық құжаттар талапқа сай толтырылмаған.

Сот ұсынылған дәлелдерді зерделей келе, медициналық мекеменің кінәсі дәлелденді деген қорытындыға келген.

Нәтижесінде талап арыз қанағаттандырылып, медициналық мекемеден науқастың пайдасына материалдық шығын мен моральдық зиянды өтеу үшін 1,5 млн теңгеден астам қаражат өндірілді.