ҚЫЗЫЛОРДАДА ҚАЙТЫС БОЛҒАН АДАМ 22 ЖЫЛДАН КЕЙІН ЕМХАНАҒА ТІРКЕЛГЕН

 Қызылордада әлеуметтік желі қолданушысы 2001 жылы қайтыс болған әкесінің 2023 жылдан бері жекеменшік медициналық ұйымға тіркеліп тұрғанын анықтағанын жазды. Оның айтуынша, емхана өкілдері марқұмның медициналық ұйымға электрондық цифрлық қолтаңба арқылы тіркелгенін айтқан, – деп хабарлайды Opennews.kz ақпараттық агенттігі.

 Әлеуметтік желіде Қызылордадағы жекеменшік медициналық клиникаға қатысты жазба қызу талқыланып жатыр. Жазба авторы әкесінің 2001 жылы қайтыс болғанына қарамастан, 2023 жылдан бастап емхана базасында тіркелгенін анықтағанын айтады. Автордың айтуынша, ол жуырда әкесінің деректерін тексеру кезінде марқұмның Қызылордадағы «ДостарМед_Liпе» жекеменшік клиникасына тіркелгенін байқаған. 2001 жылы бақилық болған адам 2023 жылы қалай өз еркімен өтініш беріп, қол қойды?!

 Жазба авторы емханаға барып, жағдайдың мән-жайын сұрағанын жазады. Оның мәліметінше, клиника тарапынан марқұмның 2023 жылы өз ЭЦҚ-сымен тіркелгені, алайда содан бері емханаға келмегені айтылған. 

 Бұл жерде жауапсыз қалған басты сұрақ көп. Егер адам 2001 жылы қайтыс болса, 2023 жылы оның атынан электрондық тіркеу қалай жүргізілген? ЭЦҚ қолданылды ма? Биометриялық сәйкестендіру болды ма? Тіркеуге өтінішті кім берді? Медициналық ұйымның ақпараттық жүйесіне мәлімет кім енгізді?

 Егер әлеуметтік желідегі ақпарат расталса, мәселе бір ғана адамның емхана базасында қате тіркелуінен әлдеқайда маңызды болуы мүмкін.

 «КҮНІНЕ КЕМІНДЕ 5 АДАМ ТІРКЕҢДЕР ДЕП АЙТАТЫН»

 Даудың күшеюіне басқа қолданушылардың пікірлері де себеп болып отыр.

 Жазба астында өзін осы клиникада бұрын жұмыс істеген қызметкер ретінде таныстырған қолданушы медициналық қызметкерлерді адамдарды емханаға тіркеуге мәжбүрлегенін жазған.

Оның айтуынша, қызметкерлерге күн сайын кемінде бес адам тіркеу тапсырылған.

 Алайда бұл – әлеуметтік желі қолданушысының мәлімдемесі. Оның айтқандарының шындыққа сәйкестігін құзырлы органдар мен клиника өкілдерінің ресми түсініктемесі арқылы анықтау қажет.

 «МЕНІ ДЕ БАСҚА ПОЛИКЛИНИКАДАН ДЕРЕКТЕРІМДІ АЛЫП, ТІРКЕП ҚОЙҒАН»

 Тағы бір қолданушы өзінің де осыған ұқсас жағдайға тап болғанын жазған.

 Бұрын басқа емханаға тіркелгеніне қарамастан, деректері оның келісімінсіз «Достармед» клиникасында пайда болған. Қолданушы бұл жағдайдың екі рет қайталанғанын айтып отыр. Тіпті ауырған кезде өзінің бұрынғы емханасына барғанында:

 Егер мұндай жағдайлар жеке-жеке қателік емес, жүйелі сипат алғаны дәлелденсе, онда мәселе емалушылардың жеке деректерінің қауіпсіздігіне, медициналық ұйымға тіркеу тәртібіне және мемлекеттік қаржының мақсатты жұмсалуына қатысты болуы мүмкін.

 Бұл жерде ең маңыздысы, әлеуметтік желідегі жазбаларды жай ғана тарату емес, ресми түрде тексеру. Құзырлы органдар мына сұрақтарға жауап беруі тиіс:

 2001 жылы қайтыс болған адамның 2023 жылы аталған клиникаға тіркелуі қалай жүзеге асқан?

 Тіркеу кезінде қандай әдіс қолданылған: ЭЦҚ, биометрия немесе басқа тәсіл ме?

 Марқұмның атынан тіркеу туралы өтінішті кім және қашан берген?

 Аталған пациент бойынша мемлекеттен медициналық қызмет көрсетуге немесе тіркелген халық санына байланысты қаржы аударылған ба?

 Клиникада бұған дейін басқа азаматтардың да келісімінсіз тіркелу фактілері болған-болмағаны тексерілді ме?

 Егер тексеру барысында мәлімдемелер расталса, жауапты тұлғалардың әрекетіне құқықтық баға берілуі тиіс. Ал әзірге бір нәрсе анық: 2001 жылы қайтыс болған адамның 2023 жылы өз еркімен емханаға тіркелгені туралы дерек жай техникалық қате ме, әлде оның артында басқа мәселе тұр ма?

 Бұл сұраққа әлеуметтік желідегі пікір емес, ресми тексеру нәтижесі жауап беруі керек. Редакция аталған клиника мен жауапты мемлекеттік органдардың ресми пікірін алуға дайын.