"Мұрнымнан қан кеткенше өлең жаздым": Құрманай Бақтиярқызы пандемиядғы қиындықтарды еске алды

Ақын, асаба, бірнеше хит әндердің авторы Құрманай Бақтиярқызы "Таңғы Studio" бағдарламасында "Біз біргеміз" әнінің сөзі қалай шыққаны туралы айтты. Пандемия кезінде індеттен көз жұмғандарға арналған бұл ән ақынның жан толқынысынан туған.

 "Мен бұл өлеңнің әр сөзін жазған сайын жыладым. Халықтың жүгін, мұң-мұқтажын арқалау, халықтың рухын көтеру, ол сөздің бәрін ойлап табу және жан-дүниеңді салып шығару оңай болған жоқ. Сосын Ринатқа ( "Азия" тобының әншісі Ринат Баситов - ред.) жібердім де былай дедім: "Ринат, сен уайымдама, жүрекпен жазылған сөз жүрекке жетеді". Бір аптадан кейін Ринат сүйінші сұрап звондады. Кейін әншілер дүние келген балапанымды, сәбиімді бүкіл халыққа жеткізді. Бейнебаян түсірді. Оны көріп, тағы да жыладым. Менің ойымдағыны жеткізді.  Еңсесі түсіп отырған халыққа "бірге жеңеміз, бәріне төземіз, жақсылықтың жаршысымыз" деп, рух бердім деп ойлаймын", – дейді ол.

Сондай-ақ, ақын былтыр індеттен қайтыс болғандардың рухына күн сайын 10-15 арнау жазғанын да айтып өтті.

 "Мен тек қана әнге сөз жазбаймын. Былтыр індет өршігенде қаншама жақынымыздан айырылып қалдық. Кеше де Амангелді (Амангелді Сейітхан -ред.) бауырымыздан айырылып халдық. Ескендір ағамыздан айырылдық. Жақынынан айырылған адамдардың бәрі маған хабарласты. Бүкіл Қазақстаннан хабарласты. Бір күнде 10-15 адамға дейін арнау жаздым. Әрқайсысы 5-10 минуттан. Күндіз-түні ұйықтамай, мұрнымнан қан кеткенше өлең жаздым", – деді Құрманай Бақтиярқызы.