Димаш Құдайберген Халықаралық көші-қон ұйымының жаһандық ізгі ниет елшісі атанды

Женевада өткен БҰҰ Халықаралық көші-қон ұйымының сессиясында әнші Димаш Құдайбергенге жаһандық ізгі ниет елшісі мәртебесі берілді,-деп хабарлайды Opennews.kz ақпарат агенттігі.

Бұл атақ оның мигранттарды қолдау, гуманитарлық жобаларды ілгерілету және қайырымдылық шараларына белсенді қатысуына орай табысталды.

2024–2025 жылдары Димаш ХКҰ-мен бірлескен ақпараттық компанияларға қатысып, осал топтарды қорғау мәселелерін көтерді. "Stranger" әлемдік туры барысында ол инклюзивтілік пен тұрақтылықты насихаттап, көрермендерді ұйым жұмысына қолдау көрсетуге шақырды.

ХКҰ бас директоры Эми Поуп оның еңбегін жоғары бағалап, өнерпаз ұйым миссиясының жаһандық деңгейде танылуына үлес қосқанын атап өтті. Димаш бұл мәртебені үлкен жауапкершілік деп қабылдап, гуманитарлық бастамаларды қолдауды жалғастыратынын айтты.