Күніне 5 млн теңге тауып отырған жасырын казино анықталды

Алматыда күніне 5 млн теңге түсетін жасырын казино анықталды, деп хабарлайды Opennews.kz ақпарат агенттігі.


Полиция қызметкерлерінің мәліметінше, 13 қарашаға қараған түні ІІМ Ұйымдасқан қылмысқа қарсы күрес департаментінің бөлімшелері Алматы қаласында Сәтпаев көшесінің бойындағы ғимараттардың бірінде жасырын казино ұйымдастырған қылмыстық топты ұстау бойынша арнайы іс-шара өткізген.

Тыйым салынған ойын мекемесі қаланың Бостандық ауданындағы көпқабатты үйдің жертөлесінде орналасқан. Ол жерге тек құпия сөзді айту арқылы ғана кіру мүмкін болған. Арнайы іс-шара кезінде казинода 20-дан астам келушілер болған, олардың арасында 30 жылдық тәжірибесі бар ойыншылар да бар.

Іс-шара нәтижесінде 20-дан астам ойын жабдығы, ірі көлемдегі ақша, келушілердің аты-жөні жазылған тізім, ақшаның кіріс-шығыс жазбалары бар құжаттама тәркіленді. Қылмыстық әрекеттен түскен кірістің шамамен сомасы күніне 5 миллион теңгеден асып отырған.

Аталған дерек бойынша ҚР ҚК-нің 307-бабы 1-бөлігімен («Заңсыз ойын бизнесін ұйымдастыру») қылмыстық іс тіркелді. Қазір казино иесін анықтап, жауапкершілікке тарту бойынша жедел шаралар жүргізіліп жатыр.