Облыс әкімі жарты млрд теңгеге жуық қаражатқа көлік алмақ
Жетісу облысының әкімдігі 469 миллион теңгеге 28 көлік сатып алуды жоспарлауда, - деп хабарлайды "Opennews.kz" ақпарат агенттігі.
«Жетісу облысының басқармаларында көліктер бар. Бірақ ескі. Сонымен қатар кейбір басқармаларда автокөлік мүлдем жоқ. Мысалға туризм, жер, тағы бір екі басқармада көлік жоқ»,- деді Жетісу облысы әкімдігі аппараты қаржы шаруашылық бөлімінің басшысы Талап Шаухаров.
Жалпы Жетісу облысының әкімдігінде 23 басқарма бар. Оның тек үшеуінде ғана автокөлік жоқ. Бірақ Жетісу облысының әкімдігі бірден 23 басқарманың барлығына, одан бөлек мәслихатқа, әкім аппаратына жаңа темір тұлпар алмақ. Қазір осы 28 көлікті сатып алу үшін 469 миллион теңгеге тендер жариялаған. Ондағы әрбір көліктің бағасы 16 миллион 750 мың теңгеге белгіленген.
Ал Парламент мәжілісінің депутаты Қарақат Әбденнің айтуынша, елдегі мемлекеттік қызметкерлер қызметтік көліктерінен түсіп, астаналық шенеуніктер сияқты таксиге міну керек. Сонда бюджет шығыны бес есеге дейін азаяды. Және бұл әлемдік тәжірибеде де бар.
Депутаттың сөзінше, қазір қажет емес шығындарды қысқартып, үнемдеу тәсілдерін енгізген дұрыс. Жыл сайын қымбат көліктерді алмастырып, жаңартып сатып алу, жүргізушілерге ай сайын жалақы төлеу, әрі көліктердің күтімі мен салығына, жөндеу жұмыстары кететін ақша — үлкен шығын.
Сондай-ақ, депутат егер әкімдік расымен де көлікке мұқтаж болса, қолжетімді, қымбат емес әрі отандық өндірушілердің көліктерін таңдаған жөн екенін айтты.
Айта кетсек, жуықта Президенттің өзі де шенеуніктерге халықтың жағдайын білу үшін көліктерінен түсіп, жаяу жүруге кеңес берген еді.
