Жоспарлы сабағын өткізбей жалақы алып келген мектеп директоры жұмыстан қуылды
Астанадағы №49 мектептің директоры жыл бойы сабақ өткізбей жалақы алып келген, - деп хабарлайды "Opennews.kz" ақпарат агенттігі.
Осыған дейін Астанадағы №49 мектептің 10 сынып оқушылары мектеп директоры жоспарлы сабақтарды өткізбегенін айтып, бейнеүндеу жолдаған болатын. Оқшулардың шағымынан кейін қалалық білім басқармасы қызметтік тексеріс жүргізген.
"Қызметтік тексеру жүргізу үшін Басқарманың 26 мамырдағы № 1098 бұйрығына сәйкес жұмыс тобы құрылды. Сол күні тексеріс жүргізіліп, жұмыс қорытындысы бойынша мектеп директорының әрекеті тәртіптік комиссия отырысында қаралды. Бүгінгі таңда басқарманың 29 мамырдағы №1113 бұйрығымен №49 орта мектебінің директоры қызметінен босатылды", - деп хабарлады қалалық білім басқармасының баспасөз қызметі.
Айта кетейік, бұдан бұрын елімізде бір мектепті 7 жылдан артық басқарған директорлар жаппай тексерілетіні хабарланған болатын.
