Оқушы қыз 17 күн бойы сабаққа бармағаны үшін әкесі айыппұл төледі
1 538
Маңғыстау облысы бойынша кәмелетке толмағандардың істері жөніндегі мамандандырылған ауданаралық соты 17 күн бойы сабаққа себепсіз бармаған қыздың әкесіне қатысты әкімшілік істі қарап, оған айыппұл салды, - деп хабарлайды "Opennews.kz" ақпарат агенттігі.
Сот анықтағандай, 2009 жылы туған қыздың әкесі кәмелетке толмаған балаларды тәрбиелеу және оларға білім беру жөніндегі ата-ананың міндеттерін орындамаған. Бұл әрекеті үшін бұған дейін де әкімшілік жауапкершілікке тартылған.
«Бірақ, жағдай бір жыл ішінде қайталанып, баласы 2024 жылғы 4 қараша – 7 желтоқсан аралығында 17 күн сабақтан себепсіз қалған. Сот отырысында азамат жасаған кінәсін мойындап, болған іске өкініш танытып, қазір қызын сабақтан қалдырмай жүргенін айтқан және жеңіл жаза сұраған», - деп хабарлайды сот.
Бұл әрекеті үшін азаматқа 15 айлық есептік көрсеткіш көлемінде айыппұл немесе бес тәулікке дейін қамау көзделген.
«Сот 2025 жылдың 21 қаңтарында азаматты әкімшілік кодекстің 127-бабы 2-бөлігі бойынша кінәлі деп тауып, оған әкімшілік жаза ретінде 55 380 теңге көлемінде айыппұл салды», - деп хабарлайды Маңғыстау облысының кәмелетке толмағандардың істері жөніндегі мамандандырылған ауданаралық сотының баспасөз қызметі.
Үкім заңды күшіне енген.
