Мектепті жөндеуге бөлінген қаржының 57,5 млн теңгесін кәсіпкер қалтаға басқан
Алматы облысында екі мектепті жөндеу барысында кәсіпкерлер аса ірі көлемде бюджет қаржысын жымқырған, - деп хабарлайды "Opennews.kz" ақпарат агенттігі.
Қаржылық мониторингі агенттігінің дерегіне сүйенсек, Алматы облысын Кербұлақ ауданындағы 2 мектепті жөндеу үшін 2020 жылы 855 миллион теңгеге келісім жасалған. Бірақ тергеу барысында жалған жұмыс актілерін жасау анықталып отыр.
“Кербұлақ ауданының білім бөлімі мен "ПМК-7К" ЖШС арасында жалпы сомасы 855 миллион теңгені құраған "Сарыбастау" және "Қарағаш" ауылдарындағы екі мектептің күрделі жөндеуін өткізуге шарт жасалған. Құрылыс жұмыстары кезінде құрылыс компаниясының басшысы жобалау-сметалық құжаттамада көзделген жұмыстардың бөлігін орындамау, орындалған жұмыстардың актілерін жалған жасау арқылы аса ірі мөлшерде ақша қаражатын жымқырған. Оның қылмыстық әрекеттері нәтижесінде ЖШС-тің есеп айырысу шотына 57,5 миллион теңге сомасында ақша қаражаты заңсыз аударылды”, - делінген агенттік ақпаратында.
Тергеу нәтижесінде оған қатысты қылмыстық іс сотқа жолданып, айыптау үкімі шықты. Сонымен қатар сотталушы мемлекетке келтірілген 57,5 миллион теңге сомасындағы залалды толығымен өтеген.
