"Унитаздың суын ішкізді": Балалар үйінің тәрбиеленушісі халықтан көмек сұрауда
Атырауда балалар үйінің тәрбиеленушісі мекемеде әділдік орнатуын сұрады, - деп хабарлайды "Opennews.kz" ақпарат агенттігі.
Видеода Нұрдәулет есімді балалар үйінің тәрбиеленушісі халықтан көмек сұрайды. Ол онда балаларды ұратынын, унитаздың суын ішкізетінін айтады. Мұнда оған “сенен ештеңе шықпайды”, деп көңілін түсіретін көрінеді. Тіпті “анаң жезөкше” деп те талай жаман сөздер айтқан екен. Жасөспірім мекемеде әлімжеттіктің бар екенін айтып, әділеттілік орнауын талап етті.
Осы жайттан кейін балалар үйі директорының міндетін атқарушы Тамара Есентұрова Нұрдәулеттің қайда және қандай жағдайда өмір сүріп жатқанын көрсететін видео түсіріп жариялады.
Осы жайттан соң ҚР Бала құқықтары жөніндегі уәкілі Динара Зәкиеваның Атырауға болған оқиғаның анық-қанығы туралы білуі үшін арнайы келді. Бүгін Атырау облысы әкімінің орынбасары Жасұлан Бисембиев жазба жариялап, аталмыш оқиғадан кейін қандай шара қолданылатынын айтты.
"Динара Зәкиевамен бірге "Шаңырақ" отбасы үлгісіндегі балалар ауылында болдым. Сіздермен бір жаңалықпен бөліскім келеді. Балалар үйіндегі соңғы оқиғаларды ескере отырып, бейнебақылау жүйесі күшейтіліп, камералар тікелей білім бөліміне қосылады. Қазіргі таңда "Шаңырақ" отбасы үлгісіндегі балалар ауылының директоры лауазымына конкурс жарияланды. Осы байқауға қатысуға педагогика саласында тәжірибесі мол, білімі мол мамандарды шақырамын. "Шаңырақтың" өз баспасөз қызметі болатынын да атап өткім келеді. Балалар үйінде орын алған жағдайлар бұрын осы ұжымда жұмыс істеген қызметкер мен бұрынғы басшының арасындағы келіспеушіліктен туындаған. Соның салдарынан балалар зардап шегуде деп есептеймін", - деді Жасұлан Бисембиев.
Видеода Нұрдәулет есімді балалар үйінің тәрбиеленушісі халықтан көмек сұрайды. Ол онда балаларды ұратынын, унитаздың суын ішкізетінін айтады.
Директор Асылжан мен психологқа “шыға тұрыңыздар” деді. Сосын маған “Нұрдәулет, мынаның бәрін өтірік деп айт, сонда ғана Шаңыраққа келгеннен кейін лидер қыламын, 3 күн батут, 3 күн кафе-ресторанға апарамын, жаңа телефон, жаңа киімдер алып беремін”, деді. Мені өзіне сатып алғысы келді. Жоқ, мынаның бәрі шындық.
Мына видеоны сіздер көріп отырсаңыздар, мен Шаңырақта әділдік орнағанын қалаймын. Әр баланың қиналғанын қаламаймын. Мен көрген қорлықты олар көргенін қаламаймын. Мысалы, мені ұрып-соғып, унитаздың суын ішкізді. Ертең өсіп келе жатқан балаларға қандай тәрбие, өнеге болады. Маған сол қызық. Ана жақта бүкіл бала қорыққаннан үндей алмай отыр. Директор қорқытып қойған. Сол үшін сіздерден көмек сұраймын, - деді видеода.
Бұл туралы журналист Армангүл Тоқтамұрат Facebook парақшасына жариялап, мұндай іс аталған балалар үйінде бірінші рет емес екенін айтты.
Жерде жетім жыласа, көкте періште күңіренеді. Атыраудағы “Шаңырақ” балалар интернаты тағы назарда. Естеріңізде ме, осы жылдың басында тағы да “Шаңырақта” балалардың бірі қатты таяқ жеп, сенім телефонына хабарласқанын “немолчи.кз” жазған еді. Директор балалардың еш зәбір көрмегенін айтқан ал, комиссия ешқандай заңбұзушылық анықтамаған.
Міне, тағы дәл осы “Шаңырақтың” баласы шырылдап отыр. Анық-қанығын құзырлы органдар анықтай жатар, егер баланың айтқаны рас болса, жауаптылар жазаланады деп сенейік! Айтпақшы, қазір депутаттар жер-жерді аралап жүр. Осы өңірден сайланған депутаттар ескерсеңіздер!
Бір айтпағым, елдегі балалар үйі біреудің жеке үйі емес. Мемлекеттік мекеме. Яғни, директордың, тәрбиешілердің өз міндеттері бар. Сол үшін айлық алады мемлекеттен, - деп жазды журналист.
