Дәрігерлердің қарауынсыз қалған 4 жасар бала көз жұмды

Қарағандылық Диана Жұмабекова төрт жасар ұлының өліміне дәрігерлерді кінәлайды, - деп хабарлайды "Opennews.kz" ақпарат агенттігі Информбюро бағдарламасына сілтеме жасап.

Себебі суға шомылып келген соң жағдайы күрт нашарлаған ұлымды ақ халаттылар екі күн бойы қабылдамай, қараусыз қалдырды дейді. Балсынан айырылып қан жұтқан  ана жұмыстарына салғырт қараған дәрігерлерді жазалауды талап етіп отыр. Әділдік іздеген әйел полицияға арыз түсірген. Бұдан бөлек қазір оқиғаның мән-жайын медициналық қызмет сапасын бақылау департаменті де зерттеп жатыр.

Диана Жұмабекова төрт жасар ұлы Аланды ертіп өзенге шомылуға барған. Бірақ сол күні түнімен кенжесінің дене қызуы көтеріледі. Келіншек келесі күні ауылдағы медбикені шақыртып, қызу түсіретін укол салдырдым дейді. Бірақ, сол инеден кейін Аланның құсып, аяғы ауырғанын айтады анасы. Зәре-құты қашқан Диана Топар кентінің жедел жәрдем мамандарын шақыртып, баласын ауруханаға жеткізіпті. Ондағы реаниматолог дәрігер балама укол салғаннан кейін көп ұзамай ұлымның денесі құрысып, жансақтау бөлімінде қайтыс болды дейді.

Айта кетейік, Қарағанды облысының Полиция департаменті бұл деректі тіркеген. Құзырлы орган өкілдері бүлдіршіннің өлімі екі жақты пневмониядан болуы мүмкін деп отыр. Қазір қажетті сараптамалар тағайындалған. Ал, Қарағанды облысының денсаулық сақтау басқармасы да бала өліміне байланысты тексеру жүргізілетінін хабарлады.