Назарбаевтың экс-құдасы 33,75 млрд теңге болатын нысандарды қайтарды

18 қазан 2023, 17:30

1 920

Бұған дейін кәсіпкер табиғи газ импорты кезінде қаражатты ұрлау фактісі бойынша тергеу кезінде 14,5 млрд теңге көлемінде материалдық залалды өтеген болатын,- деп хабарлайды "Opennews.kz" ақпарат агенттігі.

Қаржы мониторингі агенттігі бизнесмен Қайрат Боранбаевтың мемлекетке кеңсе үй-жайларын, сауда-ойын-сауық кешенін және дене шынықтыру-сауықтыру желісін қайтарғанын хабарлады.

"Оның ішінде құны 33,75 млрд теңге болатын нысандар, атап айтқанда Алматы қаласының атақты ауданында орналасқан "Алмалы" сауда ойын орталығының ғимараты, сондай-ақ жылжымайтын мүлікті жалға беру және басқарумен айналысатын "Unity Hall" ЖШС бар. "Алматы Тауэрс" бизнес орталығында орналасқан нысанның ауданы 11 мың шаршы метрден асады", - делінген хабарламада.

Сонымен қатар мемлекет пайдасына "Fitnation" фитнес-клубтар желісі берілді. Желі нысандары Астана, Алматы және Қостанайда орналасқан.

Бұған дейін кәсіпкер табиғи газ импорты кезінде қаражатты ұрлау фактісі бойынша тергеу кезінде 14,5 млрд теңге көлемінде материалдық залалды өтеген болатын.

Қайрат Боранбаев - Қазақстанда McDonald ' s франшизасын иеленген, сондай-ақ жылжымайтын мүлік, мұнай-газ секторында активтері бар ірі қазақстандық кәсіпкер. Ресейлік "Спутник V" коронавирусына қарсы вакцина өндірілген Қарағанды фармацевтикалық кешенінің акционері болып табылады.