Өрттің салдарынан бір үйдің төрт баласы көз жұмды

Абай облысында бір үйдің төрт баласы көміртегі тотығымен уланып, көз жұмды,- деп хабарлайды "Opennews.kz" ақпарат агенттігі Abainews Telegram арнасына сілтеме жасап.

Қайғылы оқиға 25 қазан күні сағат 11:00 шамасында Абай облысының Аягөз қаласында болды. Оқиға орнына келген учаскелік полиция инспекторы төрт баланың денесін тапқан.

8 жасар егіз бен олардың 3 және 2 жастағы інілері көміртегі тотығымен уланып, көз жұмды. Балалардың әкесі жедел жәрдем жүргізушісі болып жұмыс істейді және оқиға болған кезде ол жұмыста болған, ал анасы базарға азық-түлік алуға кеткен.

Оқиға орнына жеткен өрт сөндірушілер бөлмелердің бірінде 20 шаршы метр аумақта жиһаздар мен жеке заттар жанып жатқанын анықтаған. Өрт сағат 11:10-да оқшауланып, 11:24-те толық сөндірілген. Өртті сөндіру кезінде оқиға орнынан төрт баланың денесі табылған. 

Әкімдік қазіргі таңда тиісті сараптама тағайындалып, балалардың өліміне не себеп болғаны, сондай-ақ өрттің неден шыққаны анықталып жатқанын атап өтті. 

Қаланың жергілікті тұрғындары ата-аналарға көмек көрсету үшін қаражат жинап жатыр.