"Зорлап, тірідей өртеген": ер адам 23 жылға бас бостандығынан айырылды

13 желтоқсан 2023, 12:16

1 611

Жетісу облысында 42 жастағы әйелді айуандықпен өлтірген азамат 23 жылға бас бостандығынан айырылды. Бірнеше айға созылған тергеуден кейін күдіктінің кінәсі дәлелденді, -деп хабарлайды "Opennews.kz" ақпарат агенттігі 31-арнаның Информбюроға сілтеме жасап.

Талдықорғанда 42 жастағы Эльенора Зипарованың өліміне қатысты сот шешімі шықты. Осыған дейін бір ауылда тұрып келген 35 жастағы азамат іске күдікті ретінде танылып, қамауға алынған. Тергеу қорытындысына байланысты оның кінәсі екі бап бойынша дәлелденіп, 23 жылға бас бостандығынан айырылды.

“Сотталушы кінәсін мойындаған жоқ. Дегенмен оның кінәсі куәлардың жауаптарымен және бұлтартпас генетикалық молекулярлық сот сараптамасымен толық дәлелденді. “Зорлау” және “Адам өлтіру” бойынша ер адам 23 жыл көлемінде бас бостандығынан айырылды”, – деді Жетісу облысының қылмыстық істер жөніндегі мамандандырылған ауданаралық сотының судьясы Бақыт Ермаханов.

Марқұмның анасы судьяның үкімімен келіспейді. Ол қаскөйді өмір бойына бас бостандығынан айыруды сұрайды.

“Үкіммен келісе алмаймын. Қызымды тірідей өртеген. Экспертиза барлығын дәлелдеді. Ал қазір енді мынандай деп тұр. Біз өмір бойына соттауды сұрадық. Заңгеріммен, адвокатпен келісемін. Әрі қарай тағы да дәлелдеу керек”, – деді марқұмның анасы Қарлығаш Зипарова.

Судья сотталушыдан жәбірленуші тарапқа моральдық шығын ретінде 15 миллион теңге өндіруді шешті. Сонымен бірге сотталушы жазасын қылмыстық атқару жүйесі орташа қауіпсіз мекемеде өтейді. Жәбірленуші тараптың қорғаушысы тергеу жан-жақты болғанын айтады.

“Басынан ұрған кезде оның тірі-өлі болмағанын күдікті мүмкін білмеуі де мүмкін. Сол себептен судья қатігездікпен өлтірді деп санамады. Сексуалдық сипаттағы әрекет жасап, оның өлтіргендігі бүкіл сот сараптамаларымен дәлелденіп, өз дәлелін тапты”, – деді адвокат Нұрболат Ибраев.

Еске сала кетейік, шілде айының басында Жаркент қаласында 42 жастағы әйелді белгісіз біреу түн ортасында өлтіріп, үстіне жүк көлігінің дөңгелегін қойып, өртеп жіберген. Дене мүшесінің 78 пайызы жанып кеткен марқұмның жақындары сол уақытта ауылдасынан күдіктеніп, ол ұсталған еді.