Әкімнің ұлы мектепте қызды ұрғаны үшін анасына айыппұл салынды

Павлодардағы мектептердің бірінде қызды ұрған 6-сынып оқушысының анасы кәмелетке толмаған баланы тәрбиелеу міндетін орындамағаны үшін кінәлі деп танылды. Алғашында әйел баласының қорлық көргенін айтып, кінәсін мойындамаған еді, - деп хабарлайды "Opennews.kz" ақпарат агенттігі.

Іс Павлодар облысының кәмелетке толмағандардың істері жөніндегі мамандандырылған ауданаралық сотында қаралды. Оқушының әлі кәмелет жасына толмағаны ескеріліп, анасы жауапқа тартылды.

Сот баланың мінез-құлқы анасының ұлын тәрбиелеудегі өз міндеттерін орындамауының салдары деген қорытындыға келді. Әйелге 52 мың теңге айыппұл салынды.

Бұған дейін Павлодардағы мектептердің бірінде оқушылар арасында жанжал шығып, әкімнің баласы қызды соққыға жыққан еді. Нәтижесінде Павлодар облысының кәмелетке толмағандардың істері жөніндегі мамандандырылған ауданаралық соты зардап шеккен қыздың өзі бұзақылық жасады деп айыптап, анасына айыппұл салған болатын. 

Сонымен қатар әлеуметтік желіде зардап шеккен қыздың анасының үндеуі шыққан. Полицейлер жағдайды анықтап, Павлодарда 7-сынып оқушысы мен 6-сынып оқушысы арасында жанжал болғанын хабарлады. Оқиға салдарынан қыз ауруханаға жатқызылды. Оған келтірілген жарақаттар денсаулығына жеңіл зиян ретінде бағаланды. Полицейлер баланың әрекетін денсаулыққа қасақана жеңіл зиян келтіру деп бағалаған. Іс материалдары сотқа жолданған еді.