Лауазымды тұлға амбулаторияны пайдалануға беру үшін 9 миллион пара алған
1 238
Қостанай облысында дәрігерлік амбулаториялар салуды жүзеге асыратын компанияның бас инженерінен пара алған лауазымды тұлға ұсталды, - деп хабарлайды "Opennews.kz" ақпарат агенттігі.
Ол амбулаторияны пайдалануға беру құжатына тексерместен қол қойғаны үшін 9 миллион теңге сұраған. Денсаулық сақтау объектілерін салу кезінде заңсыз сыйақы алу фактісін Қаржылық мониторинг агенттігі тергеуде.
“Авторлық қадағалау тобының басшысы бопсалау жолымен орындалған жұмыстар актілеріне және пайдалануға беру актілеріне кедергісіз қол қойғаны үшін "Ауылдық денсаулық сақтауды жаңғырту" Ұлттық жобасы шеңберінде дәрігерлік амбулаториялар салуды жүзеге асыратын компанияның бас инженерінен 9 000 000 теңге мөлшерінде заңсыз сыйақы алғаны анықталды. Тергеу әрекеттері барысында күдікті қолма-қол ақша алу кезінде ұсталды”, – делінген хабарламада.
Заңсыз сыйақы мөлшері көрсетілген объектілерді салу құнының жалпы сомасының 1% тең. Қазір сотқа дейінгі тергеу жалғасып жатыр.
