Субсидия алу үшін жасалған көзбояушылық - Тоқаев ауыл шаруашылығы саласы жайында
1 107
Мемлекет басшысы агроөнеркәсіп саласындағы мәліметтерді бұрмалау саладағы шынайы ахуалды бағалауға кедергі келтіріп отырғанын мәлім етті, - деп хабарлайды "Opennews.kz" ақпарат агенттігі.
"Агроөнеркәсіп кешенін тікелей субсидиялау тәсілінен арзан несие беру тәсіліне біртіндеп көшу – аса маңызды міндет. Бөлінген қаражаттың бәрі тиімді жұмсалуға тиіс. Алайда шындыққа жанаспайтын ақпарат беру, басқаша айтқанда, мәліметтерді бұрмалау ауыл шаруашылығындағы шынайы ахуалды бағалауға кедергі келтіріп отыр. Арнайы комиссия 2 миллион ірі қара және 3 миллионнан астам уақ мал санда бар, санатта жоқ екенін анықтады. Егін шаруашылығы саласында да осындай жайттар бар екені белгілі болды. Шын мәнінде, мұның бәрі – мемлекеттен субсидия алу үшін жасалған көзбояушылық. Ондай қылмыстық әрекеттерге тосқауыл қою қажет. Ал мұндай іспен айналысқан адамдарды жауапкершілікке тарту керек", - деп атап өтті ол.
Атап өтейік, 2023 жылы Қазақстанда ауыл шаруашылығы субсидияларын ұрлағандар қазынаға 2 млрд 600 млн теңге залал келтірген. Бұл жемқорлыққа қарсы іс-қимыл агенттігінің алдынала есептеулері. Бүгінде мемлекетік қолдауды қолды қылу бойынша Антикорда бақандай 54 қылмыстық іс жатыр.
