СЫРДАРИЯ АУДАНЫНЫҢ ӘКІМІ ҚАДІРЛІ ҚАРИЯЛАРДЫ МЕРЕКЕМЕН ҚҰТТЫҚТАДЫ

2 қазан 2024, 10:01

1 200

Сырдария аудан әкімі Берік Сәрменбаев аудандық ардагерлер кеңесінің төрағасы Мұса Келдібаев және Қоғамдық кеңес төрағасы Марат Еспенбетовпен бірге қадірлі қариялардың үйлеріне барып, мерекемен арнайы құттықтады, - деп хабарлайды "Opennews.kz" ақпарат агенттігі.

Аудан басшысы ғибратты ғұмыр иелері, Сырдария ауданының Құрметті азаматтары, соғыс және еңбек ардагері Яхия Тасыровқа, тыл ардагері Рақымжан Бәйменовке және ақын, Қазақстанның Құрметті журналисі Мұхтар Сақтаповқа игі тілегін жеткізді. Ел игілігі үшін жасаған қажырлы еңбектері өскелең ұрпаққа үлгі-өнеге екендігін атап өтіп, «Құттықтау хат» және арнайы сый-құрмет көрсетті.

Мерекеде көрсетілген құрметке ризашылығын білдірген қазыналы қариялар елдің амандығы мен тыныштығын тілеп, ақ баталарын берді.

«Қартын сыйлаған елдің қазынасы мол» деп өсиет еткен қазақ қашанда қарттарын қадірлеп өскен ұлт. Бүгінде әр шаңырақта ақылын айтып, ұлағатты ұғымдарды сіңіріп, шүпірлеген немере-шөберелерінің ортасында марқайып отырған ата-әжелерімізді көрудің өзі бір ғанибет.

Ақылы – дария, білімі – теңіз , өмірлік тәжірибесі мол сіздерден тәлім-тәрбие алған іні-қарындастарыңыз өздеріңіз бастаған игілікті істерді жалғастыруда.

Халық арасында өздеріңіздей ақсақалдардың барында ел ішінде алауыздықтың орын алмайтыны, жастарымыз жөнсіз кетпейтіні белгілі.

Қазыналы қарттарымыздың қатары ортаймасын!