Қызылорда облысының әкімі ұсынған экотаксиді халық таппай әлек

4 қазан 2024, 10:54

1 321

Қызылордалықтар мемлекет бюджетінен 1 миллиард теңгеге бөлініп алынған экотаксиді таппай жүр, - деп хабарлайды "Opennews.kz" ақпарат агенттігі.

Тұрғындар такси қызметін қолдануға арналған не арнайы қосымша, не диспетчерлік қызмет жоқ дейді.

Апта басында қызметі арзан әрі табиғатқа еш зияны жоқ көліктер қала ішінде жолаушы тасымалдауға дайын деп жарнама бергенімен, тұрғындар экотаксилерге мініп те көрмеген. Такси қызметіне арналған 100 электромобильді алуға бюджеттен 1 миллиард теңгеден аса қаржы бөлінген.

Жарнамада көліктерді танымал такси қосымшасы арқылы шақыруға болады деп көрсеткенімен, қосымшаның өзінде экотаксиге тапсырыс беруге арналған тетік жоқ болып шықты.

"Яндексті қарадым таппадым, Indrive-ты қарадым таппадым. Қалай іздейді оны? Бірақ сол қосымшасы бар ма? Оны қалай білуге болады?”, “Бір номерлер жүр ғой. Бірақ оған хабарлассаң ұрысып жатыр екен", – дейді тұрғындар.

Әкімдік танымал қосымшаға экотакси шақыруға арналған арнайы қызметті қосу бойынша келісім жүргізіліп жатқанын мәлімдеді.

"Яндекс" мобильді қосымшасының құрылтайшыларымен келіссөз жүргізіп, жақын күндері электротакси бөлімін қостыруға қол жеткізді. Қосымшаның техникалық жабдықтаушылары жаңа бөлімді енгізу шараларын жүзеге асырып жатыр. Қазақстан бойынша "Яндекс" қосымшасына электротакси қызметі тек жалғыз Қызылорда қаласында ғана алғаш рет қосылғалы отыр”, – деп жазды Қызылорда қаласы әкімдігі.

Қазақстанға тапсырыс берген 100 электромобильдің әзірге 52-сі ғана жеткізілген. Әр көлікке мемлекет қазынасынан 11 миллион теңге жұмсалды. Жарнамасы жер жарған көліктердің қашаннан бастап жолаушылар тасымалдауға кірісетіні белгісіз.