Ағасының кеудесіне пышақ сұғып алған ер адам сотталды

8 қараша 2024, 10:46

1 353

Сәтбаев қаласында жанжал үстінде ағасының кеудесін пышақ тыққан ер адамға қатысты сот үкімі жарияланды, - деп хабарлайды "Opennews.kz" ақпарат агенттігі.

Қалалық соттың мәліметінше, оқиға биыл 11 тамыз күні шамамен сағат 21:00-де болған. Айыпталушы азаматтық әйелімен бірге үйіне мас күйінде келген. Ал үйінде оның ағасымен қарындасы болған. Шамалы уақыттан кейін қонақ бөлмеге кіргенде, ағасы мен қарындасының бір-бірімен ұрысып жатқандығы туралы көрініске куә болған ол ағасын сабырға шақырған. Алайда, ағасы одан әрі агрессия таныту салдарынан жанжал шыққан.

Шамамен 22:00-де сотталушының ағасына ауыр дене жарақатын келтіру туралы ой-ниетін жүзеге асыру үшін ас бөлмеге барып, үстелден ас үй пышағын алып, диванда жатқан ағасының кеудесінің оң жақ тұсына бір рет тығып алған. Салдарынан зардап шегуші Сәтбаев қаласының №1 орталық ауруханасына «Оң жақ кеуде аймағының тесілген пышақ жарақаты, пневмоторакс» деген диагнозбен жеткізілген.

«Сот отырысында сотталушы кінәсін толық мойындап, жасаған ісіне өкінетінін айтты. Сондай-ақ оның кінәсі сотқа ұсынылған және сотта зерттелген дәлелдермен расталды. Жаза тағайындау кезінде сот кінәні толық мойындау және ауырлататын себептердің болмауы сияқты жеңілдететін мән-жайларды ескерді. Сот үкімімен ҚР ҚК 106-бабының 1-бөлігі бойынша кінәлі деп танылып, 4 (төрт) жыл мерзімге бас бостандығынан айыру жазасы тағайындалып, жазасын қылмыстық-атқару жүйесінің орташа қауіпсіздік мекемесінде өтеу белгіленді.Үкім заңды күшіне енген жоқ», - делінген хабарламада.