Есірткі жасырумен айналысқан жасөспірім ұсталды
1 356
Оралда полиция синтетикалық есірткі жасырумен айналысқан 17 жастағы жасөспірімді ұстады, - деп хабарлайды "Opennews.kz" ақпарат агенттігі.
Деркөл кентінде облыстық ПД Есірткі қылмысына қарсы іс-қимыл басқармасы жедел-іздестіру шарасы барысында 2007 жылы туған жасөспірімді ұстады.
Тінту кезінде күдіктіден 25 zip-пакет тәркіленді. Кейін ол есірткі жасырған орындарды көрсетті. Бұл жерден 109 zip-пакетке салынған 3 үлкен орама табылды.
Сараптама барысында пакеттерде 249 грамм болатын (1245 доза) α-PVP психотропты зат болғаны анықталды.
Тергеу барысында жасөспірім Қостанай облысында тұратыны белгілі болды. Ол Орал қаласына Telegram-арна арқылы жұмысқа шақырылған. Жұмыс берушілер жол жүру және тұру шығындарын өтеген. Қазір жасөспірім уақытша ұстау изоляторына қамалды, - деп жазылған хабарламада.
Бұл факті бойынша сотқа дейінгі тергеу амалдары басталды. Полиция есірткі сақтау және таратқаны үшін қылмыстық жаза барын ескертеді.
