Мемлекеттен бөлінген қаржы тиімсіз жұмсалған
Ауыл шаруашылығына бөлінген 142 млрд теңге тиімсіз жұмсалған, - деп хабарлайды "Opennews.kz" ақпарат агенттігі.
Бұл туралы Жоғары аудиторлық палата төрағасы Әлихан Смайылов айтты.
Палата төрағасы Парламент Мәжілісінің жалпы отырысында ауыл шаруашылығын субсидиялауға бөлінген мемлекеттік қаражатты пайдалану тиімділігі аудитінің қорытындыларын ұсынды.
Төрағаның айтуынша, жалпы аудит нәтижелері бойынша 142 млрд теңге бюджет қаражатының тиімсіз жоспарланғаны және пайдаланылғаны, 2 млрд теңгеге қаржылық бұзушылықтар анықталған.
Экономикалық шығындар мен жіберіп алған пайда шамамен 5 млрд теңге болды. Бюджетке 2 млрд теңге өтелді және қалпына келтірілді. 4 факт бойынша материалдар құқық қорғау органдарына жіберіледі. 322 материал әкімшілік жауапкершілікке тарту үшін жіберілді, – делінген хабарламада.
Мәжілістің Аграрлық мәселелер комитетінің барлық ұсынысы Үкіметке берілген ұсынымдарда және мемлекеттік органдарға берілген тапсырмаларда ескерілді.
