Тәліптер наразылыққа шыққан тұрғындарға оқ жаудырды

Тәліптер Ауғанстанның Нангархар провинциясында наразылыққа шыққандарға оқ жаудырды, - деп хабарлайды Tengrinews.kz тілшісі.

Қазақстанда "Талибан" қозғалысына Жоғарғы сот шешімімен тыйым салынған.

Тәліптер Ауғанстанның Нангархар провинциясында мемлекеттік туды қолдау үшін наразылыққа шыққандарға оқ жаудырған. Бұл туралы РИА Новости басылымына тұрғындар арасындағы дерекөз хабар берген. Басылым мәліметінше, қаза тапқандар мен жараланғандар бар.

Бұл уақытта жергілікті Ariana News телеарнасы мен Pajhwok агенттігі журналистерін тәліптер соққыға жыққаны хабарланды. Олар мемлекеттік туды қолдайтын наразылық акциясын түсіріп, репортаж жасамақ болған кезде соққыға жығылған. Екі журналистің аяусыз соққы жегені жергілікті БАҚ-та теріс пікір туғызды.