Енді әскери дайындықты тұрғылықты жерінде өтей аламыз
Мәжіліс әскери-патриоттық тәрбие, әскери қызмет және жекелеген орталық мемлекеттік органдардың функцияларын қайта бөлу мәселелері бойынша өзгерістер мен толықтырулар енгізу туралы заңды екінші оқылымда қабылдады,- деп хабарлайды "Opennews.kz" ақпарат агенттігі.
Түзетулерге депутаттар бастамашы болды. Олар азаматтарды әскери-патриоттық рухта тәрбиелеудің кешенді жүйесін қалыптастыру, сондай-ақ бұл жұмысқа барлық мемлекеттік органдар мен ұйымдарды тарта отырып, олардың іс-қимылдарын үйлестіру мақсатында әзірленген. Құжат 2024 жылғы 6 қарашада бірінші оқылымда мақұлданды.
Заң осы бағыттағы жұмыстарды жандандыра отырып, азаматтарды әскери-патриоттық тәрбиелеудің маңыздылығын арттыруға бағытталған. Оның аясында білім беру ұйымдарындағы әскери дайындық жетілдіріледі. Алғашқы әскери дайындық пәнінің оқытушыларына міндетті әскери қызметін өтеу туралы талаптар күшейтіліп, әскери кафедраларда сабақ беретін әскери қызметкерлердің мәртебесі белгіленді.
Әскери қызметтің де беделі артады. Енді әскери борышын өтеуге міндетті Қазақстан азаматтары әскери дайындықтан емес, тұрғылықты жері бойынша әскери дайындықтан өте алады. Әскери есепке алу автоматтандырылып, азаматтарды әскери қызметке шақыру жетілдіріледі. Әскери қызметке шақыруды кейінге қалдыру және босату негіздері оңтайландырылады. Осылайша, Қарулы Күштердің, басқа да әскерлер мен әскери құралымдардың жасақталуы ұлғайтылады. Білім беру ұйымдарында, оқушылар сарайларында, әскери бөлімдерде жұмыс істейтін әскери-патриоттық клубтар, үйірмелер қосымша білім беру аясында өз қызметін жүзеге асыра алады. Сонымен қатар әскерге шақыруға дейінгі дайындық бойынша қосымша білім берудің бағдарламалары бойынша оқитын тұлғалар «жас айбын» мәртебесін алады.
