Нақты тапсырмалар берілді

Аудан әкімдігінде ветеринариялық қауіпсіздік пен ауылды дамыту мәселелері қаралды, - деп хабарлайды "Opennews.kz" ақпарат агенттігі.

Сырдария ауданы әкімдігінде аудан әкімі Берік Сәрменбаевтың төрағалығымен кезекті отырыс өтті. Мәжілісте ауыл шаруашылығы мен елді мекенді дамытуға қатысты өзекті мәселелер талқыланды. Отырысқа аудан әкімінің орынбасарлары, бөлім басшылары, құқық қорғау органдарының өкілдері мен ауылдық округ әкімдері қатысты.

Төрт түлікті түгендеу және қауіпті аурулардың алдын алу – басты назарда

Күн тәртібіндегі бірінші мәселе – аудан көлемінде төрт түлікті түгендеу, жануарлар арасында қауіпті аурулардың алдын алу және ветеринариялық бақылау шаралары туралы болды. Бұл бағыттағы жұмыстар туралы аудандық ветеринариялық стансаның басшысы Нұрлан Дәулетбаев баяндама жасады.

Спикердің айтуынша, 2025 жылдың алғашқы 5 айында:

3047 ветеринариялық анықтама берілген;

4934 ауыл шаруашылығы жануары ветеринариялық паспорт бере отырып бірдейлендірілген.

Сонымен қатар, энзоотиялық ауруларға қарсы іс-шаралар, иесіз ит-мысықтарды аулау, Конго-Қырым геморрагиялық қызбасына қарсы алдын алу жұмыстары жоспарлы түрде жүргізіліп жатыр. Мал иелеріне ақпараттық түсіндіру жұмыстары ұйымдастырылып, елді мекендерде дезинфекциялық шаралар қолға алынған.

Аудан әкімі Берік Әбдіғаппарұлы ветеринария саласының маңыздылығына тоқталып, қауіпсіздікті қамтамасыз ету үшін жұмысты күшейту қажет екенін атап өтті.

– Ауыл шаруашылығы – біздің ауданның негізгі тірегі. Сондықтан төрт түлікті тіркеу, аурулардың алдын алу, эпизоотиялық тұрақтылықты сақтау – басты міндет. Сала жұмысын жүйелеп, тұрғындарға сапалы қызмет көрсету қажет, – деді аудан басшысы.

Шіркейлі ауылдық округінің даму барысы талқыланды

Күн тәртібіндегі екінші мәселе бойынша Шіркейлі ауылдық округінің әкімі Талғат Құламқадіров сөз сөйлеп, елді мекенде атқарылған жұмыстар мен алдағы жоспарларды баяндады.

Ауылда соңғы уақытта бірқатар инфрақұрылымдық жобалар іске асырылған:

«Қызылорда – Қоғалыкөл – Шіркейлі» бағытындағы жол жөнделіп, ауылішілік 1,2 шақырым жол асфальтталған;

Б.Жақыпов көшесіне күрделі жөндеу жұмыстары жүргізілуде;

«Ауыл аманаты» жобасы, «Кең дала» бағдарламасы және «Ұлттық жоба» аясында ауыл тұрғындары шағын кәсіптерін дамытып, мемлекеттік қолдауды тиімді пайдаланып отыр.

Берік Сәрменбаев ауылды дамыту жұмыстарының жүйелі жалғасуын, қоғамдық-саяси ахуалды тұрақты бақылауда ұстауды және халықпен кері байланысты нығайтуды тапсырды.

Қосымша мәселелер де назардан тыс қалған жоқ

Әкімдік отырысында күн тәртібіндегі негізгі мәселелермен қатар:

кәсіпкерлік саласы;

Міндетті әлеуметтік медициналық сақтандыру (МӘМС);

көлік салығының орындалуы;

тарихи-мәдени ескерткіштерді құжаттандыру сынды қосымша бағыттар қаралып, сала жетекшілеріне хаттамалық тапсырмалар жүктелді.

Мәжіліс соңында аудан әкімі көтерілген мәселелердің маңыздылығын ескеріп, орынбасарлары мен тиісті бөлім басшыларына нақты міндеттер жүктеп, оларды қатаң бақылауда ұстау қажеттігін қадап айтты.

Бұл әкімдік отырысы – ауданның әлеуметтік-экономикалық тұрақтылығын сақтау және ауыл тұрғындарының әл-ауқатын арттыруға бағытталған нақты шаралардың басын біріктірген жиын болды.