Қызылорда облысындағы 43 ауылда соңғы 3 жылда бірде-бір қылмыс тіркелмеген
Қызылорда облысында құқықбұзушылықтардың алдын алу бағытындағы профилактикалық шаралар оң нәтижесін беруде. Облыстық полиция департаментінің мәліметінше, 2025 жылдың басынан бері өңірдегі құқықбұзушылықтар саны 7,2 пайызға азайған, - деп хабарлайды "Opennews.kz" ақпарат агенттігі.
Қылмыс деңгейінің төмендеуі әсіресе онша ауыр емес, ауырлығы орташа, ауыр және аса ауыр қылмыстар, сондай-ақ мал ұрлығы мен бұзақылық деректерінде байқалады. Бұдан бөлек, қоғамдық орындар мен көшелерде, сондай-ақ мас күйінде жасалған қылмыстар саны да күрт кемігені атап өтілуде.
Ішімдіктен бас тартқан ауылдар – қауіпсіз орта
Полиция департаменті ішімдіктің салдарынан орын алатын құқықбұзушылықтардың алдын алуға бағытталған жүйелі жұмыстар жүргізіліп жатқанын мәлімдеді. Бұл ретте прокуратура, дін өкілдері, ауыл ақсақалдары, белсенді жастар мен ауыл әкімдері жұмыла әрекет етуде.
– Кәсіптік нысан иелеріне алкогольдің зияны мен әлеуметтік салдары жөнінде түсіндіру жұмыстары үздіксіз жүргізіліп келеді. Соның нәтижесінде облыстағы 12 елді мекендегі дүкендерде алкоголь өнімдері сатылмайтын болды, – делінген хабарламада.
Ішімдіктен толықтай бас тартқан ауылдар:
- Арал ауданы: Сазды, Қосжар, Жаңақұрылыс
- Қазалы ауданы: Ажар
- Қармақшы ауданы: Иіркөл
- Жалағаш ауданы: Таң, Еңбек
- Сырдария ауданы: Жетікөл
- Шиелі ауданы: Жиделіарық
- Жаңақорған ауданы: Қосүйеңкі, Манап, Өзгент
Бұл ауылдарда ішімдіктен ерікті түрде бас тарту бастамасы ел ішінде қолдау тауып, құқықтық тәртіпті нығайтуға елеулі үлес қосып отыр.
43 ауылда – 3 жылда бірде-бір қылмыс жоқ
Полиция департаменті мәлімдегендей, облыстағы 43 елді мекенде соңғы 3 жылда бірде-бір қылмыс тіркелмеген. Бұл – құқықтық мәдениет пен қоғамдық тәртіптің жақсарғанын көрсететін айқын көрсеткіштердің бірі.
Салыстырмалы түрде айтқанда, Ақтөбе облысында да 33 ауыл ішімдіктен бас тартқан. Соның ішінде 26 ауылда кейінгі кезде бірде-бір қылмыс тіркелмегені анықталған.
Қоғамдық қауіпсіздікті нығайту – ортақ міндет
Құқық қорғау органдары мен жергілікті қауымдастықтардың тығыз әріптестігі арқылы Қызылорда облысында қоғамдық тәртіп пен тұрғындардың қауіпсіздігіне бағытталған жұмыстар жалғасын табуда. Халықтың өз еркімен ішімдіктен бас тартуы, ауылдық жерлерде қылмыс деңгейінің төмендеуі – бұл бір жағынан қоғамдық сананың өзгеруі, екінші жағынан бірлік пен түсіністікке негізделген профилактикалық жұмыстың нәтижесі.
