Қаз
Рус
Қайта сотталған блогер Мұрат Әбділдә түрмеде ән айтты
1 708
Шымкент қаласындағы қылмыстық-атқару жүйесі департаменті әлеуметтік желіде блогер әрі әуесқой әнші Мұрат Әбділдәнің №54 мекемеде өнер көрсеткен сәтінен бейнежазба жариялады, - деп хабарлайды "Opennews.kz" ақпарат агенттігі.
Ақпаратқа сәйкес, түзету мекемесінде мерекелік іс-шара ұйымдастырылып, сотталғандар алдында шағын концерт өткен. Сол шарада Мұрат Әбділдә сахнада ән орындаған.
“Ассалаумағалейкүм, құрметті бауырлар. Бүгін Шымкент қаласы №54 мекемеде мерекелік іс-шара ұйымдастырылды. Алдағы уақытта осындай іс-шаралар ұйымдастырыла берсін, аман болайық”, — деді ол бейнежазбада.
Сондай-ақ блогер түрмеден шыққан соң шығармашылығын қайта жандандыратынын айтты.
“Түрмеден шыққаннан кейін шығармашылықпен айналысамын, бірнеше жаңа ән дайындап қойдым. Жақсы жаңалықтар күтіңіздер”, — деді Мұрат Әбділдә.
Айта кетейік, Мұрат Әбділдә Қылмыстық кодекстің 174-бабы — «Әлеуметтік алауыздықты қоздыру» бойынша сотталған. Бұған дейін ол шартты түрде мерзімінен бұрын босатылған болатын, алайда пробация талаптарын бірнеше рет бұзғандықтан, қайтадан колонияға жіберілді.
