Балаларын ұрып, әйелін жүре алмайтын деңгейге жеткізген ер адам ұсталды

13 қараша 2025, 11:01

1 552

Петропавл қаласында ер адам әйеліне ұзақ уақыт бойы зорлық-зомбылық көрсетіп, бес баласына қараусыздық танытқаны үшін айыпталып отыр. Оқиға туралы ақпаратты «НеМолчи.kz» қоры өзінің әлеуметтік желідегі парақшасында жариялады, - деп хабарлайды "Opennews.kz" ақпарат агенттігі.

Қор мәліметінше, зардап шеккен көп балалы ананың туысы көмек сұрап хабарласқан. Әйел жылдар бойы күйеуінің соққысына ұшырап, ауыр жарақат алған.

«Соққының салдарынан оған бірнеше ота жасалып, басына трепанация жасалған. Бірақ ер адам зорлықты тоқтатпаған. Әйел есінен танып қалатын жағдайға жеткен, соңында жүре алмай қалған», — делінген қор хабарламасында.

Қазіргі уақытта әйел анасымен бірге тұрады, өздігінен жүре алмайды және оған тұрақты күтім қажет. Ал бес баласы бұрын әкесінің қолында болған. Туыстары ең кіші баланың қайда екенін білмей, уайымдап отырғанын айтқан.

Қордың мәліметінше, ер адам жұмыс істемейді, балаларды өз бетімен қалдырған және әйелінің әлеуметтік жәрдемақы картасын иеленіп алған. Сондай-ақ оның әлеуметтік желілерде агрессивті мінез көрсеткен видеолары бар. Кейбір бейнежазбаларда ол жалаңаш күйінде орынсыз әрекеттер жасаған, олардың скриншоттары полицияға тапсырылған.

Полицияның жауабы

Солтүстік Қазақстан облыстық полиция департаменті аталған дерек бойынша тексеру жүргізгенін хабарлады.

«Полиция мен қамқоршылық органдары отбасының тұрмыс жағдайын тексеріп, 4 пен 17 жас аралығындағы балалармен және көршілерімен әңгімелесті. Анасының мекенжайы анықталды», — деді ведомство өкілдері.

Әйел күйеуінің әрекетіне қатысты арыз жазған. Ер адам уақытша қамауға алынып, әкімшілік іс қозғалды. Балалар анасына қайтарылды.

Қамқоршылық органдары балаларды уақытша кәмелетке толмағандарды бейімдеу орталығына орналастыруды жоспарлап отыр. Кейін олар анасымен бірге тұратын болады. Балаларға және анасына психологиялық көмек көрсетіледі.

«Балалар анасын көріп қатты қуанды, бірақ болған оқиғадан шошынған. Анасы мен балалары полицияға жауап беріп, зорлық-зомбылық фактілері туралы айтты. Ер адамның әйелін ғана емес, балаларын да ұрып келгені анықталды. Сараптама нәтижелері бойынша оған айып тағылуы мүмкін», — деп хабарлады «НеМолчи.kz» қоры.