2GIS қосымшасында жарылыс туралы жазба қалдырған ер адам ұсталды

14 қараша 2025, 17:00

1 568

Алматы полициясы 2GIS платформасында жарылыс жасау жөнінде қауіпті пікір қалдырған ер адамды анықтап, ұстады. Күдікті діни бірлестіктердің қызметіне қатысты жарияланған материалдың астына “Жарып жіберетін жер” деген пікір жазған, - деп хабарлайды "Opennews.kz" ақпарат агенттігі.

Қауіпті мазмұн туралы ақпарат «102» нөміріне түскеннен кейін, қалалық Полиция департаментінің Экстремизмге қарсы іс-қимыл басқармасы жедел тексеру жұмыстарын бастаған.

Полицияның ресми мәліметінше, жедел шаралар барысында пікір қалдырған адамның жеке басы анықталды. Ол — 2004 жылы туған Алматы тұрғыны. Ер адам ұсталып, полиция бөліміне жеткізілді.

Экстремизмге қарсы іс-қимыл басқармасының бастығы Асхат Дәулетияров интернет кеңістігіндегі кез келген қорқыту әрекеті қоғамға қауіп төндіретінін атап өтті:

“Мұндай “әзіліңдердің” салдары ауыр болуы мүмкін. Әрбір хабарлама тексеріледі және кінәлілер заңға сәйкес жауапқа тартылады”, – деді ол.

Полиция азаматтарды әлеуметтік желілер мен онлайн платформаларды мұқият және жауапкершілікпен пайдалануға, қауіпті немесе заңға қайшы мазмұнды таратудан бас тартуға шақырды.