Жұмысқа орналастыру ережесіне өзгерістер енгізілді
Мәжіліс депутаты Асхат Аймағамбетов Қазақстанда еңбек шартының кем дегенде бір белгісі бар қарым-қатынаста азаматтық-құқықтық шарт (ГПХ) жасасуға тыйым салынатынын мәлімдеді,- деп хабарлайды Opennews.kz ақпарат агенттігі.
Депутаттың айтуынша, азаматтық-құқықтық шарт жұмысшыны әлеуметтік кепілдіктерден айырады: еңбек демалысына шығу мүмкіндігі жоқ, жүктілік демалысы қарастырылмаған, зейнетақы жарналары мен медициналық сақтандыру төленбейді. "Көптеген жұмыс берушілер қаржысын үнемдеу мақсатында қызметкерлерді еңбек шартының орнына ГПХ бойынша жұмысқа алады, бұл қауіпті. Енді біз нақты тосқауыл қоямыз, нәтижесінде он мыңдаған адам толыққанды әлеуметтік кепілдіктерге ие болады", – деді Аймағамбетов.
Сонымен қатар депутат бір лауазымдағы қызметкерлердің жалақысындағы алшақтыққа да назар аударды. Оның пікірінше, бір кәсіпорындағы бірдей қызметкерлердің еңбекақысында бірнеше есе айырмашылық болмауы тиіс. Ұжымдық шартқа ең жоғары және ең төменгі жалақы ара қатынасын міндетті түрде белгілеу ұсынылды.
Аймағамбетов өндірісте жазатайым оқиға болған жағдайда тергеу процесін де әділ ету қажеттігін айтты. Жаңа ереже бойынша, комиссия құрамына тәуелсіз медиаторларды, сондай-ақ жұмыскердің туыстары мен адвокатын қосуға мүмкіндік қарастырылған.
Еске салсақ, бұған дейін Қазақстанда азаматтық-құқықтық шарттарды стандартты еңбек шартының орнына қолдануға тыйым салынатыны хабарланған еді.
