Бейтаныс әйел балалардың жәрдемақысын ұрып-соғып тартып алған

Жамбыл облысының Мойынқұм ауданында жергілікті тұрғын жасөспірімдерден әлеуметтік жәрдемақыны күштеп алғаны үшін сотқа тартылды,-деп хабарлайды Opennews.kz ақпарат агенттігі.

Іс материалдарына сәйкес, ағалы-қарындас жәрдемақыларын алу үшін сенімхатпен Қазпошта бөлімшесіне келген. Сол кезде олардың анасы үйде кіші баласымен қалған. 

Балалардың жәрдемақы алғанын білген әйел оларға жақындап, ақша талап еткен. Жасөспірімдер бас тартқанда, әйел күш көрсеткен. Ол балаларды жұлқылап, қалталарын тексерген, қызды жерге итеріп, тұншықтыруға әрекет жасаған. Әйелмен бірге келген күйеуі баланы ұстап, таспен қорқытып, қорлық көрсеткен.

Оқиғадан кейін балалардан 79 000 теңге алынған. Жұп оларды көлікке отырғызып, дүкенге апарып, содан кейін жіберген. Сот материалдарына сәйкес, балалар жол бойында қорлық көргендерін және балағаттаулар болғанын айтты.

Сотта әйел айыпты жоққа шығарды, ал куәгерлер балалардың өз еркімен көлікке отырғанын айтқан. Дегенмен, сот айыптау тарапының дәлелдерін сенімді деп таныды.

Нәтижесінде әйел бір жылға бас бостандығынан айыру жазасына кесілді. Ол жәрдемақыны қайтарып, жыртылған киімдердің құнын өтеді. Материалдық залалды өтеу туралы азаматтық талап бөлек қаралады.