Қызылордада екі көше екі жыл бойы қараңғыда отыр

Қызылорда қаласындағы Чайковский мен Бектұрғанова көшелерінде түнгі жарықтың жоқтығы бірнеше жылдан бері шешімін таппай келе жатқан өзекті мәселеге айналды. Қаланың дәл ортасына жақын орналасқан бұл аумақта көше шамдары кемінде екі жыл бойы мүлде жанбайды. Соның салдарынан тұрғындар күн батқан соң өз үйлеріне қауіппен қайтуға мәжбүр, - деп хабарлайды "Opennews.kz" ақпарат агенттігі Sn.kz-ке сілтеме жасап.

Жергілікті халықтың айтуынша, қараңғылық қылмыстық әрекеттерге қолайлы жағдай туғызып отыр. Жуырда мас күйдегі белгісіз адамның көпқабатты үйлердің жертөлесіне кіріп жүргені анықталып, тұрғындар полицияға арыз жазған. Куәгерлер оның кей кездері үйлердің шатырына дейін шыққанын айтады. Бұл жағдай тұрғындар арасында үрей туғызып, балалар мен қарттардың қауіпсіздігіне алаңдаушылықты күшейткен.

Аталған мәселе бойынша тиісті органдарға бірнеше мәрте шағым түссе де, нақты нәтиже байқалмайды. Тұрғындардың өтініші прокуратураға жолданғаны айтылғанымен, көшелер әлі де қараңғы күйінде қалып отыр. Жауапты мекемелердің үнсіздігі халықтың наразылығын күшейтіп, жергілікті билікке деген сенімді әлсіретуде.

Көшелерді жарықтандыру – сән-салтанат емес, ең алдымен тұрғындардың қауіпсіздігін қамтамасыз ететін маңызды инфрақұрылым. Алайда Қызылорда қаласы әкімдігі мен жауапты қызметтердің бұл мәселеге салғырт қарауы қарапайым халықтың өміріне тікелей қауіп төндіріп отыр.