Қар барысы өзімен суретке түскісі келген әйелге шабуыл жасап, бетін жарақаттаған

Қытайда турист әйел қар барысына жақындап, селфи жасамақ болған сәтте шабуылға ұшырап, ауыр жарақат алған,- деп хабарлайды Оpennews.kz ақпарат агенттігі.

БАҚ мәліметінше, әйел шаңғымен сырғанап жүрген. Қонақүйге қайтып бара жатқан жолда ол қар үстінде жатқан қар барысын байқаған. Билік бұл аймақта жыртқыштың пайда болғаны жөнінде алдын ала ескерту жасаған. Турист оған қарамастан жануарға шамамен үш метр қашықтыққа дейін жақындап, суретке түспек болған.

Қар барысы кенеттен әйелге шабуыл жасаған. Ол әйелді қалың қардың арасына құлатып, басып алған. Кейін оған айналасындағылар көмекке ұмтылған. Әйелдің беті қанға боялған.

Әйелді қар барысының шабуылынан басындағы шлем қорғап қалған. Нұсқаушы шаңғы таяқтарымен жыртқышты үркіткеннен кейін ғана шабуыл тоқтаған.

Әйел жергілікті ауруханаға жеткізілген. Дәрігерлер оның жағдайы тұрақты, өміріне қауіп жоқ екенін хабарлаған.