Каспий жағалауының маңында өлі аққулар табылды

Теңіз жағасында қырылған құстарды жергілікті тұрғын байқап, бұл туралы әлеуметтік желіде жариялаған,- деп хабарлайды Opennews.kz ақпарат агенттігі Kaz.inform.kz сайтына сілтеме жасап.

Жағалауда әртүрлі жағдайда жатқан құстар кездескен: кейбірі жақында өлген болса, енді бірі ұзақ уақыт бойы жатқан.

Осы жағдайға қатысты облыстық орман шаруашылығы және жануарлар дүниесі аумақтық инспекциясы түсініктеме берген. Ведомство мәліметінше, құстардың жаппай қырылу дерегі тіркелмеген.

Қазіргі уақытта Түпқараған ауданы мен Ақтау қаласы маңындағы жағалау аймақтарында мониторинг жүргізіліп жатыр. Жағдай құзырлы органдардың бақылауына алынып, тиісті қызметтер жұмыс істеуде. Қарақия-Қаракөл қорықшасы аумағындағы Қаракөл көлінде құстардың қырылу жағдайлары тіркелмегені хабарланған.