Қазақстандық фильмдердің жарнамасынан Kinopark заңсыз қаржы алып келген
1 517
Бәсекелестікті қорғау және дамыту агенттігінің Алматы қаласындағы департаменті Kinopark - Kinoplexx Theatres кинотеатрлар желісінің қазақстандық режиссерлері түсірген фильмдерден заңсыз жарна алып келгенін анықтады, - деп хабарлайды Opennews.kz ақпарат агенттігі kyn.kz сайтына сілтеме жасап.
Кейбір фильмдер өз жарнамасы үшін ақша төлемегендіктен прокатқа шығарылмаған.
«Kinopark – Kinoplexx Theatres кинотеатрлар желісі үстем жағдайды теріс пайдаланып келген. Дәлірек айтсақ, кинотеатрлар желісі отандық киноөндірушілерді жарнама бюджетін төлеуге міндеттеген. Әйтпегенде, фильмдерді прокатқа шығармаған», – деп хабарлайды агенттік.
Бұл талаптар нарықтағы бәсекелестікті шектеп, киноөндірушілердің заңды құқықтарына нұқсан келтірген. Киноөндірушілердің кинопрокат нарығына кіруіне кедергілер туғызып, отандық кинематографияның дамуына тежегіш болған.
«Осыған байланысты Kinopark – Kinoplexx Theatres компаниясына Қазақстан Республикасының бәсекелестікті қорғау саласындағы заңнамасын бұзу белгілерінің бар екендігі туралы хабарлама жолданды. Хабарламаны қараған желі заң бұзу фактілерін жойды», – деп хабарлайды агенттік.
Енді Қазақстанда түсірілген фильмдер прокатқа шығу үшін міндетті жарнама шығындарын төлемейді.
