Еріктілердің көмегімен 670 есірткі сайты бұғатталды

26 наурыз 2026, 14:30

1 513

Алматыда еріктілердің көмегімен 670 есірткі сайты бұғатталды,-деп хабарлайды Opennews.kz ақпарат агенттігі Kaz.inform.kz сайтына сілтеме жасап.

Есірткі қылмысына қарсы күресте еріктілердің үлесі айтарлықтай артып келеді. Полиция өкілдерінің айтуынша, заңсыз интернет-ресурстарды анықтауда қоғам белсенділері маңызды рөл атқаруда. Жедел уәкіл Сұлушаш Досболованың мәліметінше, жыл басынан бері бірлескен жұмыстардың нәтижесінде есірткі таратумен айналысқан 670-тен астам сайт пен Telegram-арна анықталып, бұғатталған.

Оның айтуынша, мұндай ресурстарды анықтау бірнеше тәсіл арқылы жүзеге асады. Атап айтқанда, интернет кеңістігін тұрақты мониторинг жасау, азаматтардан келіп түсетін хабарламалар, «E-Өтініш» платформасы және жедел ақпарат арналары негізгі дереккөз болып отыр.

-Біз ақпаратты әртүрлі бағытта жинаймыз: бір жағынан тұрғындардың көмегі болса, екінші жағынан әлеуметтік желілерге өзіміз де тұрақты бақылау жүргіземіз. Анықталған заңсыз ресурстар арнайы «Кибернадзор» жүйесіне жіберіліп, кейін бұғаттау шаралары қабылданады, – деді Сұлушаш Досболова

Барлық сайттар бірден жабыла бермейтіні атап өтілді. Кей жағдайда құқық қорғау органдары есірткі таратумен айналысатын тұлғаларды анықтау мақсатында ресурстарды уақытша бақылауда ұстайды.

- Азаматтардан келіп түсетін ақпарат қауіпті жедел анықтап, шешім қабылдауға мүмкіндік береді. Есірткі тарататын наркосайтты, Telegram-арна мен есірткі жарнамалап жатқандарды көрсеңіз, +7 700 113 0102 WhatsApp нөміріне немесе Narko Shekteu Almaty тelegram-каналына хабарлап айтуға болады, - деді ол