Ақылы автотұрақтар қымбаттауы мүмкін
Жақын уақытта елордадағы ақылы автотұрақтар коммуналдық меншікке өтеді. Бұл туралы Астана әкімінің орынбасары Ерсін Өтебаев мәлімдеді, - деп хабарлайды Opennews.kz ақпараттық агенттігі Baq.kz сайтына сілтеме жасап.
Автотұрақтар қала меншігіне өтеді. Әкім орынбасарының айтуынша, бұған дейін автотұрақтарды басқарған компания оңалту рәсімінен өтіп жатқан.
Әкімдік өкілінің сөзінше, ақылы автотұрақтар бұған дейін де қомақты табыс әкелген.
Бұрын айыппұлдармен қоса есептегенде 5 миллиард теңгеден астам табыс түсті. Бұл – жүйе іске қосылғаннан бергі көрсеткіш, — деді ол.
Айыппұлдан түскен қаражат толықтай қала бюджетіне түседі. Автотұрақ ақысынан жиналған қаржының 75%-ы қалалық компанияға, 25%-ы бюджетке бағытталады. Автотұрақ көбейіп, баға қымбаттауы мүмкін. Әкімдік ақылы автотұрақтар желісін кеңейту мүмкіндігін де жоққа шығармайды.
Қаланың өсуін ескере отырып, бұл жұмысты жалғастырамыз. Кей жерлерде тариф саясаты қайта қаралып, баға өсуі мүмкін. Әсіресе халық тығыз орналасқан аумақтарда, мысалы, сол жағалауда, — деді әкім орынбасары.
Билік тұрғындарға қолайлы жағдай жасау тетіктерін де қарастырып жатыр. Жоспар бойынша, жексенбі күндері және әлеуметтік нысандар маңындағы автотұрақтар тегін болуы мүмкін. Қазір бұл мәселе қаралып жатыр.
