Қазақстандықтар жүргізуші куәлігімен Дубайда да көлік басқара алады

8 шілде 2026, 11:00

1 511

Қазақстан мен БАӘ-нің ішкі істер министрліктері жүргізуші куәліктерін өзара тану және айырбастау туралы меморандумға қол қойды,- деп хабарлайды Opennews.kz ақпараттық агенттігі.

Құжатқа 2026 жылғы 25-ші маусымда Абу-Даби қаласында қол қойылған. Меморандум 2026 жылғы 25-ші шілдеден бастап күшіне енбек. ІІМ әкімшілік полиция комитетінің ерекше тапсырмалар жөніндегі аға инспекторы Ақтоты Боранованың айтуынша, келісім екі негізгі жағдайды қарастырылған.

Біріншісі – азаматтардың туристік, іскерлік немесе жеке мақсатпен уақытша сапарлары. Мұндай жағдайда Қазақстан мен Біріккен Араб Әмірліктері бір-бірінің қолданыстағы ұлттық жүргізуші куәліктерін өзара таниды. Бұл Қазақстан азаматтарына БАӘ аумағында өздерінің жарамды ұлттық жүргізуші куәлігімен автокөлік басқаруға мүмкіндік береді. Екінші жағдай – Қазақстан азаматының Біріккен Араб Әмірліктеріне тұрақты немесе ұзақ мерзімге қоныс аударып, тұруға ықтиярхат алуы. Бұл ретте жүргізуші куәлігін жергілікті куәлікке емтихан тапсырмай-ақ айырбастауға болады,-делінген хабарламада.

Жаңа меморандум екі ел арасындағы көлік қатынасын жеңілдетіп, Қазақстан азаматтарының Біріккен Араб Әмірліктерінде көлік пайдалану мүмкіндіктерін кеңейтеді.