Теміржолшы жұмыстағы жазатайым оқиға үшін соттасты

Павлодарда теміржолшы жұмыстағы жазатайым оқиғадан кейін мүгедек болып қалған,- деп хабарлайды Opennews.kz ақпарат агенттігі.

 Ер адамның көзіне металл жарықшағы кіріп кеткен. Оқиғаны зерттеген комиссия жұмыс беруші 70% кінәлі, ал қалған 30% кінә зардап шегушінің өзінде деген шешімге келген. Мамандар оны абайсыздық танытты деп есептеген. Жұмыскер бұнымен келіспей, сотқа жүгінген. Істі Павлодар облысының мамандандырылған ауданаралық әкімшілік соты қараған.
Іс материалдарына сәйкес, ер адамның жарақаты өте ауыр болып шыққан, кейіннен оған III топтағы мүгедектік белгіленген. Тергеу барысында жұмыс берушінің зардап шегушіге қорғаныш көзілдірігі берілгенін дәлелдей алмағаны анықталған. Сондай-ақ, жұмысшының еңбекті қорғау нұсқаулықтарымен және тиісті бұйрықпен танысқаны туралы сенімді дәлел табылмаған. Сонымен қатар, сот кәсіпорында еңбекті қорғаудың тиісті жағдайлары қамтамасыз етілмегенін анықтаған. Жұмыс беруші жеке қорғаныс құралдарының қолданылуын бақыламаған, жұмысты орындаудың қауіпсіз тәртібін айқындамаған, қызметкерлер арасында міндеттерді бөлмеген және тиісті өндірістік бақылауды ұйымдастырмаған.

Шешім заңды күшіне енген.