Байссенге демалуға барған ер адам жансақтау бөлімінен бір-ақ шықты
24 жастағы жігіт қала сыртындағы демалыс аймағында бассейнге барып, кейін жансақтау бөліміне түсті,- деп Opennews.kz ақпарат агенттігі “Жетінші арнаға” сілтеме жасап хабарлайды.
Оның жақындары кінәлілердің жауапқа тартылуын талап етіп отыр.
Оқыс жағдай PrimeVill демалыс кешенінде болған. Ер адам бассейнде жүзіп жүргенде есінен танып, суға бата бастаған. Сол жерде демалып жүрген басқа адамдар оған алғашқы көмек көрсеткен. Куәгерлердің айтуынша, сол сәтте оқиға орнында құтқарушы да, медицина қызметкері де, тіпті алғашқы көмек көрсетуге арналған дәрі қобдишасы да болмаған. Жедел жәрдемді де демалушылар өздері шақырған. Қазір жігіт жансақтау бөлімінде жатыр.
Зардап шеккен жігіттің анасы әділдік орнамаса, мұндай жағдайлар басқа демалыс орындарында да қайталануы мүмкін екенін ескертті.
Қайғылы оқиға болған демалыс базасы қазір де жұмысын жалғастырып жатыр. Демалыс кешені әкімшілігінің мәліметінше, ер адам бассейнге басымен төмен қарай секірген. Мұндай әрекетке тыйым салынғанына қарамастан, ол ережені бұзған. Әкімшілік бұл туралы кешен аумағында арнайы ескерту тақтайшалары мен ақпараттық стендтер орнатылғанын мәлімдеді.
Демалыс кешені әкімшілігінің мәліметінше, оқиға болған сәтте кезекшілікте арнайы дайындықтан өткен екі құтқарушы болған. Медициналық қызметкерлер келгенге дейін сондағы құтқарулардың бірі оған алғашқы медициналық көмек көрсеткен. Әкімшілік бұл деректердің барлығы бейнебақылау камераларындағы жазбалармен растайтінін мәлімдеді.
Қазір оқиғаға байланысты құқық қорғау органдары тергеу жүргізіп жатыр.
