Кәріз құдығында қаза тапқан 6 адамның отбасына несиесін өтеуге көмек көрсетіледі

Павлодар облысында кәріз құдығындағы газдан уланған алты адамның несиесін өтеуге көмек көрсетіледі,- деп хабарлайды Оpennews.kz ақпарат агенттігі.

Аймақ басшысы Асайын Байханов жазатайым оқиға орын алып, салдарынан алты қызметкер қаза болған "Aqtogai Milk" ЖШС-не барған. Облыс әкімі қаза болған азаматтардың отбасыларымен кездесіп, жақындарының қайғысына ортақтасып, көңіл айтты және оларға жан-жақты қолдау көрсетілетінін жеткізген.

Сондай-ақ компания кәмелетке толмаған балаларының 18 жасқа дейінгі күтімі мен білім алуына байланысты барлық шығынды өз мойнына алған.

Асайын Байханов Мемлекеттік еңбек инспекциясы комитеті департаментіне, Полиция департаментіне және прокуратураға аталған оқиғаны тергеуді ерекше бақылауға алуды тапсырған.

Еске салайық, Павлодар облысының Ақтоғай ауданындағы Жоламан ауылында кәріз құдығындағы газдан уланып қалған алты жұмысшы көз жұмған. Оқиға орнында 1963, 1975, 1983, 1998, 2006 және 2009 жылы туған алты ер адамның көз жұмғанын медицина қызметкерлері анықтаған. Тағы бір 1988 жылы туған ер адам Ақтоғай аудандық ауруханасына жеткізілген.