Әскери қызметшілердің тұрғын үй мәселесі

Ақмола гарнизонының әскери соты тұрғын үй комиссиясы баспанаға мұқтаж деп танудан бас тартқан әскери қызметшінің пайдасына шешім шығарды. Комиссияның бас тартуына Астанада ипотекаға алынған пәтердің болуы себеп болған, - деп хабарлайды Opennews.kz ақпарат агенттігі.

Талап қоюшы М. Қазақстан Республикасы Қорғаныс министрлігінің Ақмола аудандық пайдалану бөліміне қарсы сотқа жүгінді. Даудың туындауына тұрғын үй комиссиясының 2026 жылғы 9 сәуірдегі шешімі негіз болған. Аталған шешімге сәйкес, елордада жылжымайтын мүлкі бар әйелді баспанаға мұқтаж деп танудан бас тартылған.

Алайда сот процесі барысында әскери қызметшінің бұл пәтерді "Отбасы банк" АҚ арқылы ипотекаға сатып алғаны анықталды. Комиссияға жүгінген кезде оның банк алдындағы кепіл міндеттемелері толық орындалмаған, ал жылжымайтын мүлікке ауыртпалық салынған.

Нәтижесінде сот тұрғын үй комиссиясының 2026 жылғы 9 сәуірдегі шешімін заңсыз деп танып, оның күшін жойды. Қорғаныс министрлігіне әскери қызметшінің пайдасына шешім қабылдап, оны алғашқы баянаты тіркелген күннен бастап баспанаға мұқтаж деп тану, сондай-ақ сот шығындарын өтеу міндеттелді.

Сот шешімі заңды күшіне енді.