Екі қазақстандық 1600 адамға заңсыз қарыз беріп, 579 миллион теңге табыс тапқан

Қостанай облысында лицензиясыз микроқаржылық қызмет көрсетіп, 1 600-ден астам азаматтан ақша алған екі тұрғын сотталды. Сот екеуін де мүлкін тәркілей отырып, 2 жылға бас бостандығынан айырды, - деп  хабарлайды  Opennews.kz  ақпарат агенттігі.

Тергеу мәліметінше, олар 2024-2025 жылдары "Союз-Костанай", "Экспресс Тенге", "Express Gold" және "Express.com" ЖШС-лерінің жұмысын ұйымдастырған. Компаниялар негізінен облыстың аудан орталықтары мен кенттерінде қызмет көрсеткен.

Кәсіпкерлер азаматтарға зергерлік бұйымдарын кепілге қойып, ақша алуды ұсынған. Алайда іс жүзінде бұл қызмет комиссиялық сауда ретінде рәсімделіп отырған. Ақшаны пайдаланғаны үшін клиенттерден күн сайын 0,4 пайыз мөлшерінде сыйақы алынған.

Сонымен қатар азаматтармен жазбаша қарыз шарттары жасалмаған. Мәмілелерді заңды комиссиялық қызмет ретінде көрсету үшін формалды құжаттар рәсімделіп, төлемдер тауарды сатуды кейінге қалдырғаны немесе оны сақтағаны үшін алынатын комиссия ретінде көрсетілген.

Екі жыл ішінде бұл қызметті 1 600-ден астам азамат пайдаланған. Заңсыз қызметтен түскен кіріс 579 миллион теңгеден асқан.

Сот екі айыпталушыны да мүлкін тәркілей отырып, 2 жылға бас бостандығынан айырды. Тәркіленген мүлік қатарында бес пәтер, үш автокөлік және екі жер телімі бар.

Сот үкімі әзірге заңды күшіне енген жоқ.