«Қайғылы оқиға қайталанды»: мектеп алдындағы «зебрада» тағы бір баланы көлік қақты

Полиция мәліметінше, 28 қыркүйек күні сағат 13:30 шамасында Kia Rio автокөлігінің жүргізушісі Нұрсая шағын ауданындағы мектеп маңында «зебрамен» жолдан өтіп бара жатқан 2013 жылғы баланы қағып кеткен, - деп хабарлайды   Opennews.kz   ақпарат агенттігі.
Зардап шеккен бала облыстық балалар ауруханасына жеткізілді. Қазіргі уақытта полиция жол-көлік оқиғасының барлық мән-жайын анықтап жатыр.
Алаңдатарлығы — жол апаты көктемде адам өлімімен аяқталған қайғылы оқиға болған дәл сол жерде қайталанып отыр.

6 сәуірде осы мектептің маңындағы реттелмейтін жаяу жүргіншілер өткелінде Toyota Hiace шағын автобусы жеті жастағы бірінші сынып оқушысын қағып, салдарынан қыз бала қаза тапқан.

Кейін сот жүргізушіні кінәлі деп танып, оны екі жылға бас бостандығынан айырды. Сондай-ақ бес жыл мерзімге көлік құралдарын басқару құқығынан айырды.

Сол қайғылы оқиғадан кейін BINOM мектебінің маңындағы қауіпсіздік мәселесі бірнеше рет көтерілген.

Алайда соған қарамастан, бұл жаяу жүргіншілер өткеліндегі қауіпсіздік мәселесі әлі де шешілмеген сыңайлы.