Елдегі компаниялар қай сала мамандарына жоғары жалақы ұсынуға әзір
245
Қазақстандағы жұмыс іздеушілердің басым бөлігі орта есеппен 295 мың теңге жалақы алуға үмітті. Ал жұмыс берушілер ұсынып отырған еңбекақы бұл сұраныстан 17,6 пайызға аз, деп хабарлайды Opennews.kz ақпарат агенттігі Ulysmedia.kz сайтына сілтеме жасап.
Жұмыс іздеу және қызметкерлерді іріктеуге арналған HeadHunter онлайн-платформасы жасаған шолу деректеріне сүйенсек, биылғы II тоқсанында жұмыс берушілер ұсынған жалақы 1,25 пайызға өскен. Бүгінде жұмысшы іздеген кәсіпорындар 243 мың теңге төлеуге дайын.
Ең жоғары жалақыдан үмітті жұмыс іздеушілер екі қалаға назар қойғаны абзал. Олар – Нұр-Сұлтан (орташа жалақы 281 мың теңге) және Алматы (орташа жалақы 248 мың теңге) қалалары.
Еліміздің басқа өңірлерде жалақы төмен. Қазіргі уақытта жоғары еңбекақы кеңес беру саласының мамандарында. Бұл салаға риэлтор, деректерге талдау жасау және брокерлер кіреді. Аталған бағытта қызмет еткісі келетін азаматтарға компаниялар орташа есеппен 520 мың теңге жалақы төлемек.
Сондай-ақ, шикізат өндіру саласына (геодезис, инженер, геолог) назар аударған жөн. Бұл сала мамандарының орташа жалақысы 400 мың теңгеден асады.
Бұған қоса IT технологиялармен айналысатын мамандардың жалақысы жоғары. Тәжірибесіз қызметкерлер үшін орташа жалақы - 220 мың теңге болса, көпжылдық қызмет өтілі бар жұмыскерлерге шамамен 850 мың теңге айлық ұсынылып отыр.
