ҚЫЗЫЛОРДАДА «ЕРЕКШЕ» БАЛАЛАРҒА АРНАЛҒАН ОРТАЛЫҚ АШЫЛДЫ

Қызылорда қаласында «Розалия и Эмир» жеке қоры  18 жасқа дейінгі ментальді, сөйлеу қабілеті бұзылған және аутистік спектр кінәраттары бар балаларға арналған орталықты пайдалануға берді,- деп хабарлайды Opennews.kz ақпарат агенттігі.

Аталған қор 2019 жылы «Әрекет» жобасы аясында өз жұмысын бастаған.  Ал, биыл материалдық-техникалық базасын жаңарту және негізгі құралдармен жабдықтау бойынша ғимарат ауданын кеңейтті. Сондай-ақ, аталған мекемеде «Қараңғы сенсорлық бөлме» және «Күрделі ырғақ логосы» сынды инновациялық жабдықтары бар екі кабинет ашылды.  Онда емдеу шаралары педагогикалық түзету логопед-дефектолог пен психолог-педагог мамандарының диагноз қоюынан кейін жүргізіледі. 

Шарада облыстық қоғамдық даму басқармасы басшысының орынбасары  Қуаныш Жанұзақов қор жетекшісін құттықтап, орталықтың аймақ үшін үлкен көмегі тиетінін атап өтті.

-Біз балаларды әлеуметтік тұрғыдан бейімдеуге және олардың толыққанды өмірін қалыптастыруға көмектескіміз келеді. Осы тұста,  «Samruk-Kazyna Trust» корпоративтік қорына қолдау көрсеткені үшін алғыс білдіреміз, - деді «Розалия және Эмир» жеке қорының жетекшісі Розалия Рахимова.

Орталықта дипломы бар мамандар жұмыс істейді: логопедтер, дефектологтар, психологтар, ЕДТ-мамандар, АВА-терапевттер. Орталықтың педагогикалық қызметкерлері күнделікті өмірге дайындау үшін балалармен түзету, дамыту, оқыту жұмыстарын жүргізеді. Сабақтар қажетті дидактикалық, педагогикалық және спорттық құрал-жабдықтары бар бірнеше оқу кабинеттерінде өтеді.