Бұрынғы күйеуі автобуста әйелге шабуыл жасады: оқиға автобустың бейнебақылау камерасына жазылған. Сот-медициналық сараптама тағайындалды, деп хабарлайды Opennews.kz ақпарат агенттігі Zakon.kz сайтына сілтеме жасап.

 

Құқық қорғаушы Дина Смаилова Facebook парақшасында мән-жайды баяндап, Алматы қаласының бас полицейіне жүгінді.

Оның жазуынша, ер адам төрт күн бойы бұрынғы әйелін жұмысының жанында торуылдаумен болған. Сондай-ақ жазбада ерлі-зайыптының ажырасқанына екі жыл болса да, бұрынғы күйеуі әйелге тыныштық бермегені айтылған.

Алматы полиция департаментінің баспасөз қызметі жағдайға түсініктеме берді.

Бұл факт сотқа дейінгі тергеп-тексерудің бірыңғай тізіліміне Қазақстан Республикасының Қылмыстық кодексінің 293-бабының 3-бөлігі бойынша тіркелді. Сот-медициналық сараптама тағайындалды,- деді Алматы қалалық полиция департаментінің баспасөз қызметі.

Сондай-ақ кешенді тергеу шаралары жүргізіліп жатқаны, соның қорытындысы бойынша бұл қылмыстық іске қатысты түпкілікті процессуалдық шешім шығарылатыны мәлім болды.